भक्तपुरः प्रधानमन्त्री केपी शर्मा ओलीले सुरुङ खनेर काठमाडौंबाट नुवाकोट सदरमुकाम विदुर आधा घन्टामै पुर्याउने बताएका छन् ।
वन तथा भू–संरक्षण मन्त्रालयअन्तर्गत सूर्यविनायकको २ सय ४५ हेक्टर वन क्षेत्रमा बन्ने अन्तर्राष्ट्रियस्तरको प्राणी उद्यानउक्त उद्यानको बिहीबार एक समारोहबीच शिलान्यास गर्दै प्रधानमन्त्री ओलीले नेपाललाई नयाँ युगमा प्रवेश गराउन काठमाडौं–विदुर सुरुङ मार्ग निर्माण प्रक्रिया अघि बढाएको बताएका हुन् ।
हाल नुवाकोटको सदरमुकाम विदुर पुग्न कम्तीमा तीन घन्टा लाग्छ । तर काठमाडौं–विदुर ४.१७५ किलोमिटर सुरुङ बनेपछि कम्तीमा आधा घन्टामा विदुर पुग्न सकिने प्रधानमन्त्रीको दावी थियो ।
उनले यो नयाँ सोच र प्रयोग सफल भएपछि अन्यत्र यस्तै प्रयोग गरिने बताए । ‘साधारण बाटोभन्दा सुरुङ मागै बनाउँदा धेरै गुणा खर्च लाग्छ तर धेरै गुणा बलियो पनि हुन्छ’, प्रम ओलीले भने, ‘सुरुङ बनाएपछि पहिरो पनि आउँदैन । भत्किन पनि पाउँदैन । यो धेरै वर्षसम्म टिक्छ ।’
उनले काठमाडौं–विदुर सुरुङ मार्ग बनाउन पनि धेरै लागे पनि यात्रा छोटिँदा हुने लगातारको बचतले धेरै लागत पनि कम हुने बताए ।
शिलान्यास कार्यक्रममा बोल्दै प्रधानमन्त्री ओलीले उद्यान सञ्चालनमा आएसँगै भक्तपुरका धेरै क्षेत्रमा विकास ल्याउने दावी गरेका हुन् ।
‘प्राणी उद्यान सञ्चालनमा आएपछि यो हेर्न धेरै मान्छेहरु हेर्न आउनेछन्’, उनले थपे, ‘यहाँ आएपछि यहीं खाजा, खाना खानेछन्, आराम गर्ने छन् । यसले यहाँको गुणात्मक वृद्धि विकास हुनेछ । भक्तपुरको अन्य क्षेत्रमा समेत धेरै विकास ल्याउने निश्चित छ ।’
कला–संस्कृतिको जीवित संग्रहालय बन्दै आएको भक्तपुरमा प्राणी तथा वनस्पतिहरुको अर्को जीवित संग्रहालयसमेत थपिएको प्रधानमन्त्री ओलीको भनाइ थियो ।
यसरी मानव निर्मित र प्राकृतिक जीवित संग्रहालय भएको संसारमा अन्यत्र कतै नभएको दावी गर्दै उनले यी दुईको संगमले भक्तपुर सम्बृद्ध र विकसित हुने जिकिर गरे ।
‘भक्तपुरको एकातिर कला–संस्कृतिको जीवित संग्रहालय र अर्कोतिर प्राणी तथा वनस्पतिहरुको अर्को जीवित संग्रहालय । दुनियाँ यस्ता अन्यत्र पाइँदैन । जुन भक्तपुरमा हुँदैछ’, उनले भने, ‘यी भक्तपुरको सम्बृद्धि र सपन्नताको द्योतक हुन् ।’
कार्यक्रममा वनमन्त्री अग्निप्रसाद सापकोटाले स्थानीयबासिन्दा र सरकारको सहकार्यमा करिब दस वर्षपछि प्राणी उद्यानले मूर्तरुप पाउन लागेको बताए ।
उनले यसलाई शिलान्यास गरेर त्यत्तिकै नछाडिने जिकिर गरे । ‘यस प्राणी उद्यानको शिलान्यासमात्रै हुनेछैन, कार्यान्वयन भएरै छाड्छ’, वनमन्त्री सापकोटाले भने, ‘यसमा क्रमभंग हुन्छ । सरकारको तर्फबाट प्रतिबद्धता नै भयो ।’
नेपाल मजदुर किसान पार्टीका अध्यक्ष एवम् सांसद नारायणमान बिजुक्छेले स्थानीय बासिन्दाका समस्यालाई सम्बोधन अहिल्यै के कसरी गर्नेबारे ध्यान दिन सुझाव दिए ।
उनले अन्य निकुञ्ज तथा वन क्षेत्रबाट स्थानीय बासिन्दालाई हुने दुःख तथा हानी नोक्सानीबारे पनि अहिल्यै सोच्नुपर्ने धारणा राखे ।
कार्यक्रममा जानकारी दिइएअनुसार आगामी आर्थिक वर्षभित्र प्राणी उद्यानको वन क्षेत्रको सीमा छुट्याई तारबार लगाइने छ । अर्को वर्षभित्र उद्यानको विस्तृत गुरुयोजना निर्माण गरिने वन तथा भूसंरक्षण मन्त्रालयका सचिव उदयचन्द्र ठाकुरले जानकारी दिए ।
प्रतिक्रिया दिनुहोस !
