एजेन्सीः परमाणु आपूर्तिकर्ता समूह (एनएसजी) को सदस्यताका लागि भारतीय प्रधानमन्त्री नरेन्द्र मोदीले चिनियाँ राष्ट्रपति सी सी जिनपिङसँग सहयोग मागेका छन् । भारतीय विदेश मन्त्रालयका प्रवक्ता विकास स्वरूपले उक्त जानकारी दिएका छन् ।
चीनले भारतलाई उक्त समूहको सदस्यता दिने विषयमा समर्थन गरेको छैन । टर्की, न्युजिल्यान्ड र दक्षिण अफ्रिका जस्ता देशले भारतलाई समर्थन नगरेको भनेर चीनले बताउँदै आएको छ । भारतले भने चीनको समर्थन आफूलाई मिलेमा ती देशको विरोधको अर्थ नरहने धारणा बनाएको छ ।
एनएसजीको सदस्यता पाउन चीनको निकै महत्व रहेको छ । मोदी संघाई सहयोग संगठन (एससिओ) को वार्षिक सम्मेलनमा भाग लिन बिहीबार यहाँ आइपुगेका हुन् ।
यसअघि पाकिस्तानका राष्ट्रपति ममनुन हुसैनले सीलाई भेटेका थिए । चीनले पाकिस्तानको पक्ष लिएको भन्दै हुसैनले सीलाई धन्यवाद दिएका थिए ।
भारतलाई एनएसजीको सदस्यता दिने विषय सोलमा आयोजना बैठकमा नराखिएको भन्दै चीनले विरोध गरेको थियो । अमेरिका, फ्रान्स जस्ता देशले भारतको पक्षमा वकालत गर्दै आएका छन् । उक्त समूहको सदस्य हुनलाई सर्वसम्मत समर्थन आवश्यक पर्छ ।
प्रतिक्रिया दिनुहोस !
