शंकर शर्मा, अर्थविद्
जनमतसंग्रहको परिणामअनुसार युरोपेली युनियनबाट बेलायत बाहिरिएको छ । यसले युरोपलगायत विश्वभरकै अर्थतन्त्र प्रभावित पार्ने देखिन्छ । बेलायत नेपालको पुरानो विकास साझेदार हो । बेलायतसँग दुई सय वर्षदेखि हाम्रो सम्बन्ध सुमधुर रहँदै आएको छ । बेलायत अहिलेको हाम्रो सबैभन्दा ठूलो विदेशी दातृ मुलुक हो ।
शुक्रबारको जनमतसंग्रहपछि बेलायती पाउन्डको भाउमा अचानक गिरावट आएको छ । नेपाललाई बेलायतले दिँदै आएको सहायता अबका दिनमा प्रभावित हुन्छ कि हुँदैन अहिले नै भन्न सकिने अवस्था छैन ।
युरोपेली युनियनबाट बाहिरिएपछि बेलायतको अर्थतन्त्रमा कुन हदसम्म नकारात्मक असर पर्नेछ र त्यसलाई सामना गर्न बेलायतले कस्तो नीति अख्तियार गर्छ त्यसमा धेरै कुरा निर्भर गर्नेछ । बेलायतको अर्थतन्त्र तहसनहस भयो भने उसले नेपालजस्ता मुलुकलाई दिने वैदेशिक सहायता प्रभावित हुनेछ ।
स्कटल्यान्ड र नर्दन आयरल्यान्डले बेलायतबाट अलग हुन जनमतसंग्रह गर्न चाहेका समाचारहरू आइरहेका छन् । ती बेलायती भूभागले बेलायतबाट अलग हुन चाहे बेलायतमा राजनीतिक अस्थिरता हुन सक्छ । जसका कारण बेलायतको अर्थतन्त्र थप प्रभावित हुनसक्छ । बेलायतको राजनीतिक स्थिरता र अर्थतन्त्र आगामी दिनमा कुन दिशामा जान्छन् त्यसमा नेपालसँगको विकास सहायता पनि निर्भर गर्नेछ ।
सँगसँगै बेलायतले युरोपेली युनियनमा रहेको दस प्रतिशत आर्थिक हिस्सा त्यसबाट बाहिरिएसँगै कम हुनेछ । ईयूको प्रमुख साझेदार मुलुक बेलायत भएकाले यसको तत्काल असर बेलायतलाई भन्दा ईयूलाई बढी हुने देखिन्छ ।
युरोपेली युनियनले पनि नेपाललाई सहायता दिँदै आएको छ । ईयू आर्थिक रूपमा कमजोर हुँदा आगामी दिनमा युरोपेली युनियनले नेपाललाई दिने सहयोगको मात्रा कटौती हुने देखिन्छ । (सन्तोष घिमिरेसँगको कुराकानीमा आधारित)
प्रतिक्रिया दिनुहोस !
