काठमाडौं: युरोपियन युनियनबाट बाहिरिने निर्णयसँगै बेलायत आफैँ बिभाजित हुने अवस्थामा पुगेको छ ।
स्क्टल्यान्डकी फर्स्ट मिनिस्टर निकोला स्टरजियोले शुक्रबार ब्रेग्जिटको पक्षमा बेलायती जनता उभिएपछि स्कटल्यान्डको स्वतन्त्रताका लागि एकपटक फेरि जनमत संग्रहतर्फ संकेत गरेपछि बेलायत विभाजित हुने अवस्था आएको हो ।
५० लाख को जनसंख्या रहेको स्कटल्यान्ड ब्रेग्जिटका लागि भएको मतदानमा युरोपियन युनियनमा रहिरहनुपर्ने पक्षामा बलियोसँग उभिएको थियो ।
स्कटल्यान्डका ६२ प्रतिशत बासिन्दाले ब्रिटेनले युरोपियन युनियन छोड्न नहुने पक्षमा मतदान गरेका थिए ।
जबकि त्यहाँका ३८ प्रतिशत बासिन्दालेमात्रै ब्रिटेनले युरोपियन युनियनबाट बाहिरिनुपर्ने पक्षमा मत दिएका थिए । यसको उल्टो इङ्ल्यान्डका ५१.९ प्रतिशत बासिन्दाले ब्रेग्जिटको पक्षमा र ४८.१ प्रतिशतले विरोधमा मतदान गरेका थिए ।
'स्कटल्यान्डका बसिन्दाले ईयूमा रहिरहने पक्षमा मतदान गरे । तर, उनीहरुले पनि बाध्य भएर युरोपियन युनियनबाट अलग हुनुपरेको छ', स्कटल्यान्डको राजधानी एडिनबर्गमा एक पत्रकार सम्मेलनमा सटरजियोनले भनिन्, 'लोकतान्त्रिक प्रक्रियामा यसलाई स्वीकार्न सकिन्न । मलाई लाग्छ अब ब्रिटेनबाट स्कटल्यान्डले स्वतन्त्र हुनका लागि जनमत संग्रहमा जानुपर्छ ।'
यदि स्कटल्यान्डको स्वतन्त्रताका लागि जनमत संग्रह भयो भने इङ्ल्यान्डसँग उसको ३ सय वर्ष पुरानो सम्बन्ध समाप्त हुने खतरा बढ्दै गएको छ । यस्तो हुन गयो भने ईयूबाट बाहिरिएर ईयू जस्तै संरचना बनाउने तयारीमा लागेको ग्रेट ब्रिटेनका लागि ठूलो झट्का मानिनेछ ।
सन् २०१४ मा स्वतन्त्रतका लागि भएको जनमत संग्रहमा ५५ प्रतिशत स्कटिस जनताले ब्रिटेनमै रहने निर्णय गरेका थिए । त्यसको विपक्षमा ४५ प्रतिशत जनता उभिएका थिए ।
त्यो बेला स्कटल्यान्डको स्वतन्त्रताका लागि भएको जनमतमा युरोपियन युनियनमा रहिरहने मुद्दा पनि उठेको थियो । स्कटल्यान्डका लागि त्यो बेला ब्रिटेनबाट स्वतन्त्र भएमा २८ देश रहेको युरोपियन युनियनको सदस्यता पाउन सक्ने सम्भावना कम थियो ।
स्टरजियोनले त्यो बेला युरोपियन युनियनको सदस्यता मिल्न सक्ने सम्भावना नरहेकाले अधिकांश स्कटिस जनता ब्रिटेनमै रहने पक्षमा उभिएको पनि प्रष्ट पारेकी छन् । उनले अब फेरि आफूहरुको त्यो निर्णयमा पुनर्निवचार गर्ने बताएकी छन् ।
के हो ब्रिटेन र स्कटल्यान्डको मामिला
इङ्गल्यान्ड, स्कटल्यान्ड र वेल्सको संघलाई ग्रेट ब्रिटेन भनिन्छ । तीनैवटा अलग अलग प्रान्त हुन् । तीनैवटा आफ्नो संसद छ । तर विदेश नीति र सुरक्षा जस्ता मुद्दाको फैसला भने ब्रिटेनको संघीय संसदले गर्छ ।
यहाँसम्म कि स्कटल्यान्डको राष्ट्रिय झन्डा पनि आफ्नै रहेको छ । राजस्वको बाँडफाँटका अलाब ग्रेट ब्रिटेन (इङ्गल्यान्ड, वेल्स र स्कटल्यान्ड) का प्रान्तबीच पनि विदेश नीतिलाई लिएर विवाद चल्दै आएको छ ।
१ मे १७०७ मा स्कटल्यान्ड र इङ्गल्यान्डबीच संयुक्त अधिराज्यमा सामेल हुने कुरामा सम्झौता भएको थियो ।
प्रतिक्रिया दिनुहोस !
