भगवती थापा
हामी खेलाडीका लागि कुनै पनि ठूला फुटबल प्रतियोगिता एक प्रकारको चाड नै हो । समूहगत चरणमा राम्रा खेल हेरेकी थिएँ । अब नकआउट चरणका सबै खेल हेर्ने प्रयास गरिरहेकी छु ।
एपीएफ क्लबको खेलडी भएकाले बिहान दैनिक अभ्यास हुन्छ । त्यसकारण रातिको खेल हेर्न गाह्रो छ । तर हाइलाइट भने पनि हेर्नै पर्छ । युरोकप हामी खेलाडीका लागि सिक्ने मौका पनि हो ।
बेलुका हेरेको खेल र राम्रा खेलाडीको खेल्ने तरिकालाई मैदानमा उतार्न सकियो भने धेरै फाइदा हुन्छ । म रक्षक भएकीले प्रायजसो रक्षकको खेल्ने तरिकालाई ध्यान दिएर हेर्छु ।
युरोकपमा अहिलेसम्मको खेल हेर्दा बलिया राष्ट्रकै दबदबा देखिन्छ । नकआउट चरणको खेल भर्खर सुरु भएकोले विजेताको अनुमान गर्न गाह्रो छ ।
विश्वकप होस् वा युरोकप मलाई मन पर्ने टोली इङ्ल्यान्ड हो । इङ्ल्यान्डको खेल्नै शैली राम्रो लाग्छ । इङ्ल्यान्डको टोलीमा जुझारु खेलाडी छन् ।
इङ्ल्यान्डको टिम भावना पनि उच्चस्तरको छ । तर इङ्ल्यान्ड राम्रो खेले पनि जहिल्यै हार्ने गरेको छ । अभागी इङ्ल्यान्डले यस पटक युरोकप जिते राम्रो हुन्थ्यो ।
इङ्ल्यान्डसँगै वेल्स, जर्मनी र पोर्चुगलको खेल पनि राम्रो छ । वेल्सले पनि यस पटक धेरै राम्रो खेलिरहेको छ । जर्मनी र पोर्चुगलको खेल पनि स्तरीय छ । विश्वकप विजेता जर्मनी सदाबहार र सन्तुलित टोली हो ।
जर्मन टोलीका खेलाडीमा टिम स्पिरिट बलियो छ । जर्मनीको खेल्ने शैली पनि आक्रामक देखिन्छ । व्यक्तिगत रूपमा सबै खेलाडी राम्रा छन् ।
युवा र अनुभवी खेलाडीले भरिएको जर्मनको पास र काउन्टर प्रहार धेरै राम्रो छ । मेरो विचारमा युरोकप इङ्ल्यान्ड, वेल्स, जर्मनी र पोर्चुगलमध्ये एउटाले जित्न सक्छ । मैले बच्चैदेखि इङ्ल्यान्डको समर्थन गर्दै आएकीले उसैले उपाधि जिते खुसी हुन्थेँ । (भगवती राष्ट्रिय महिला फुटबल टोलीकी रक्षक हुन् ।)
प्रतिक्रिया दिनुहोस !
