एजेन्सीः जारी युरोकप फुटबलको अहिलेसम्मकै सबैभन्दा चर्चित भिडन्तमा आइतबार राति स्पेन र इटाली भिड्दैछन्।
प्रतियोगिताको उपाधि दाबेदार मानिएका दुवै टोली प्रिक्वार्टरफाइनलमै आपसमा भिड्ने भएपछि एउटा दाबेदार टोली अन्तिम १६ बाटै बिदा हुने निश्चित छ । सबैभन्दा महत्वपूर्ण तथ्य त यी दुवै टोली गत संस्करणको फाइनलमा भिडेका थिए । इटालीलाई ४–० गोलले पराजित गरी स्पेनले उपाधि रक्षा गरेको थियो।
युरोकपमा उपाधि रक्षा गर्ने स्पेन पहिलो टोली बनेको थियो । यस पटक स्पेन युरोकप सर्वाधिक जित्ने टोली बन्ने प्रयासमा छ । त्योभन्दा पनि गत विश्वकपमा समूहगत चरणबाटै बाहिरिएपछि खस्किएको साख फर्काउनुपर्ने चुनौती पनि स्पेनलाई छ । त्यसैले यो भिडन्तमा इटालीभन्दा पनि स्पेनको प्रदर्शन सबैका लागि चासोको विषय बनेको छ ।
विश्वकपमा युुरोपियन राष्ट्रको प्रभाव बढिरहेका बेला युरोकपमा पनि इटाली र स्पेन दुवै प्रिक्वार्टरफाइनल खेल जितेर आफू उपाधिको बलियो दाबेदार भएको सन्देश दिन चाहन्छन् ।
युरोकपमा अघिल्ला दुई संस्करण अर्थात् सन् २००८ देखि भएका प्रतियोगितामा यी दुई टोली लगातार आपसमा भिडेका छन् भने ती भिडन्तमा स्पेन विजयी भएको छ । त्यसअघि भएका युरोकप र विश्वकप भिडन्तमा भने स्पेनमाथि इटाली हावी हुँदै आएको थियो ।
‘सन् २००८ यता स्पेन हाम्रा लागि स्थायी प्रतिद्वन्द्वीजस्तै भएको छ, त्यसैले हामी उसँग बदला लिन हान्छौं । तर यसलाई व्यवहारमा उतार्नु सहज छैन’, इटालीका रक्षक जर्जियो चेलिनी भन्छन् ।
इटालीले स्पेनलाई सन् १९३४ को विश्वकपको क्वार्टरफाइनलमा १–० र सन् १९९४ को विश्वकपको क्वार्टरफाइनलमा २–१ गोलले हराएको थियो । सन् १९८८ को युरोकपको समूहगत चरणमा पनि १–० गोलले हराएको थियो ।
यसैगरी सन् २००८ को युरोकपको क्वार्टरफाइनलमा भने स्पेनले इटालीलाई टाइब्रेकरमा ४–२ गोलले हराएको थियो । जारी युरोकपको समूहगत चरणमा यी दुई टोलीबीच केही समान तथ्य रहे ।
दुवै टोली समूहगत चरणको आआफ्नो अन्तिम खेलमा पराजित भएका थिए । त्यसअघिका दुवै खेलमा इटाली र स्पेन विजयी भएका थिए ।
स्पेनले चेक गणतन्त्रलाई १–० र टर्कीलाई ३–० गोलले पराजित गरेको थियो भने क्रोएसियासँग २–१ गोलले पराजित भएको थियो ।
इटालीले बेल्जियमलाई २–० र स्विडेनलाई १–० गोलले पराजित गरेको थियो भने आयरल्यान्डसँग १–० गोलले पराजित भएको थियो ।
स्पेनले व्यहोरेको गोल पनि अर्थपूर्ण रह्यो । युरोकपमा स्पेनले १२ वर्षपछि पहिलो हार व्यहोरेको थियो भने सात खेलपछि पहिलो गोल खाएको थियो ।
इङ्ल्यान्डलाई सानो आइसल्यान्ड चुनौती
पहिलो पटक युरोकप जित्ने योजनामा रहेको इङ्ल्यान्डले मंगलबार बिहान हुने प्रतियोगिताको अन्तिम प्रिक्वार्टरफाइनल खेलमा आइसल्यान्डको सामना गर्दैछ ।
समूहगत चरणमा अपराजित रहे पनि एक जित र दुई बराबरीको नतिजा निकालेको इङ्ल्यान्डलाई आइसल्यान्ड बलियो चुनौती हुनेछ । युरोकपमा पहिलो पटक सहभागी हुने क्रममा नकआउट चरणको यात्रा तय गरेको आइसल्यान्ड विभिन्न कारणले चर्चामा छ ।
आइसल्यान्ड युरोकप खेल्ने सबैभन्दा कम जनसंख्या भएको राष्ट्र हो । करिब तीन लाख ५० हजार जनसंख्या भएको आइसल्यान्डले समूहगत चरणमा बलियो प्रदर्शन गर्यो । अपराजित रहेको आइसल्यान्डले एक जित र दुई बराबरीको नतिजा निकाल्ने क्रममा पोर्चुगल र हंगेरीसँग अंक बाँढेको थियो । आइसल्यान्डले अस्ट्रियालाई भने २–१ गोलले हराएको थियो ।
यसैगरी इङ्ल्यान्डले रुससँग १–१ तथा स्लोभाकियासँग गोलरहित बराबरी खेलेको थियो भने वेल्सलाई २–१ गोलले हराएको थियो ।
इङ्ल्यान्डविरुद्धको इतिहास भने आइसल्यान्डको पक्षमा छैन । हालसम्म यी दुई टोली ११ पटक आपसमा भिडेका छन्। उक्त भिडन्तमा इङ्ल्यान्डले नौ जित र दुई बराबरीको नतिजा निकालेको छ ।
पछिल्लो पटक यी दुई टोली सन् २००४ मा आपसमा भिडेका थिए । उक्त भिडन्तमा इङ्ल्यान्ड ६–१ गोलले विजयी भएको थियो ।
प्रतिक्रिया दिनुहोस !
