बेलकोटः कुनै समय नुवाकोट र रसुवाको एकमात्र सडक मार्गकारुपमा रहेको पासाङल्हामु मार्गको यात्रा हाल निकै जोखिमपूर्ण बन्दै गएको छ । सो मार्ग अन्र्तगत पर्ने त्रिशूली–काठमाडौं तथा त्रिशूली–धुन्चे सडकको यात्रा कष्टप्रद र जोखिमपूर्ण बन्दै गएको छ ।
वर्षातको समयमा त यी दुवै सडक मार्गमा यात्रा गर्ने हजारौँ यात्रुहरु भगवान पुकार्दै यात्रा गर्ने गरेका छन् । साघुँरो र धेरै घुम्तीहरु रहेको चार दशक पूरानो पासाङल्हामु मार्ग जोखिमपूर्ण बन्नुमा मर्मत, सम्भार र विस्तार हुन नसक्नु मुख्य कारण रहेको बेलकोट गाविस–७ अमारेका शम्भु तिवारीले बताए ।
सोही मार्ग हुँदै सयौँ विद्यार्थीहरु विद्यालय जाने भएका कारण भिरालो, साघुरो र जोखिमयुक्त सडकमा यात्रा गर्नै डराउने गरेको पञ्चकन्या उच्च माविका प्राचार्यसमेत रहेका तिवारीले बताए । तीन वर्षयता सो सडकमार्गमा सानाठूला दश भन्दा बढी दुर्घटना भइसकेका छन् ।
सो सडकमार्गमा दुर्घटनामा परी हालसम्म ५० जना भन्दाबढीको निधन भइसकेको जिल्ला प्रहरी कार्यालय नुवाकोटले जनाएको छ । साँघुरो खाल्डाखुल्डी र भिरालो सडकका कारण दुर्घटना हुने गरेको प्रहरीले जनाएको छ ।
त्रिशूलीदेखि ७० किलोमिटर दूरीको पासाङल्हामु मार्गको त्रिशूली काठमाडौं सडक तत्काल मर्मत गरिनुपर्ने मदानपुरका रमेश पाण्डेले बताए । सडक जीर्ण भएकाले एउटै गाडीमा एकै परिवारका व्यक्तिहरु यात्रा पनि गर्दैनन् ।
सोही सडकबाट नुवाकोटको विभिन्न अन्नभण्डारको साथै पर्यटकीयक्षेत्र ककनीसमेत जाने भएका कारण सरकारले सडक कार्यालयमार्फत मर्मत तथा विस्तार गरी दुई लेनको बनाउनुपर्ने ककनीकी माया तामाङले बताइन् । सो सडक मार्गमा पहिरो झरेर सवारी साधन पुरिएर दुर्घटना हुने गरेको छ ।
गत वर्ष माथिबाट पहिरो आएर यात्रुबाहक वस पुरिँदा चारजनाको मृत्यु भएको थियो । सो रुटमा हाल दैनिक तीन सय भन्दाबढी बस, माइक्रोवस र मिनिबसलगायतका यातायातका साधनहरु गुड्ने गरेका छन् ।
यसका साथै पासाङल्हामु मार्गको त्रिशूली–धुन्चे सडकसमेत विभिन्न स्थानमा पहिरोले जोखिमपूर्ण बन्दै गएको छ । ४५ किलोमिटर लामो सडकमार्गको बीचमा रहेको राम्चे, ग्राङ र मुलखर्कमा स्थायी पहिरो जाने समस्याले यात्रुहरु जोखिमपूर्ण यात्रा गर्न बाध्य भएका हुन् ।
तीन दिनअघि मात्र स्याफ्रुवेसी–रसुवागढी सडकखण्डमा सशस्त्र प्रहरी बल रसुवाका प्रहरी नायव उपरीक्षक दर्शन गिरी चढेको पिकअप भ्यानमा टिमूरे नजिकै माथिबाट खसेको पहिरोसहितको ढुंगाले लागेको थियो । वर्षा सुरु हुनासाथ सडक मार्गमा जाने पहिरोको स्थायीरुपमा समाधानका प्रयास नगरिँदा यात्रुहरु जोखिमपूर्ण यात्रा गर्न बाध्य भएको यातायात व्यवसायी इश्वरलाल श्रेष्ठ बताउँछन् ।
त्रिशूली धुन्चे सडक खण्डको ग्राङभीरमा गत २०७२ कात्तिक १६ गते यात्रुवस दुर्घटनामा परी बस मालिकसहित ३७ यात्रुको मृत्यु भएको थियो । सो दुर्घटना साँघुरो र भीरालो सडकका कारण भएको यातायात व्यवसायीहरु बताउँछन् ।
डिभिजनल सडक कार्यालय नं. ५ नुवाकोटले पासाङल्हामु मार्गको त्रिशूली काठमाडौं तथा त्रिशूली धुन्चे सडक खण्ड विभिन्न आयोजनामार्फत मर्मत भइरहेको जनाएको छ ।
पहिलो चरणमा ककनीदेखि बालाजुसम्मको सडक विस्तार भइरहेको कार्यालय प्रमुख रोहितकुमार बिसुरालले जानकारी दिए ।
प्रतिक्रिया दिनुहोस !
