न्युजर्सीः सोमबार कोपा अमेरिका फुटबलको फाइनलमा आफ्नो टोली चिलीसँग टाइब्रेकरमा पराजित भएलगत्तै अर्जेन्टिनाका कप्तान लियोनल मेसी भक्कानिएर रोए ।
टेलिभिजनको पर्दामा समेत निकै भावुक रूपमा प्रस्तुत भएका २९ वर्षीय मेसीले भने, ‘मैले टोलीलाई सक्ने जति सबै गरेँं तर, केही कुरामा कहिल्यै सफल हुन सकिन । चार प्रतियोगिताको फाइनलमा पुगेँ तर एउटै पनि प्रतियोगिताको उपाधि जित्न नसक्नु मेरा लागि दुःखको कुरो हो ।'
उनले यो क्षण आफ्ना लागि निकै कठिन भएको समेत बताए । ‘मेरा लागि यो वास्तवमै कठिन समय हो । अर्जेन्टिनी टोलीका लागि पनि कठिन समय हो', मेसीले भने, ‘तर अब मैले अर्जेन्टिनी टोलीबाट खेल्ने कुनै सम्भावना छैन ।'
खेल सकिएपछि निकै भावुक देखिएका मेसीले मैदानमै आँसुसमेत झारेका थिए । अन्य सहकर्मीले सम्झाउँदासमेत मेसीले आँसु रोक्न सकेनन् ।
हारको पीडाकै बीच मेसीले अर्जेन्टिनाको राष्ट्रिय टोलीबाट सन्न्यासको घोषणा गरे । एक टेलिभिजनसँगको कुराकानीमा उनले राष्ट्रिय टोली छाड्ने निर्णय सार्वजनिक गरे । यद्यपि अन्तर्राष्ट्रिय सञ्चार माध्यमले अर्जेन्टिनी फुटबल अधिकारीले मेसीलाई सन्न्यासको निर्णय फिर्ता लिन दबाब दिने अनुमान गरेका छन् ।
चिलीविरुद्धको टाइब्रेकरमा गोल गर्न चुकेका मेसीले खेलपछि अर्जेन्टिनी टेलिभिजन च्यानलसँग आफूले राष्ट्रिय टोलीबाट सन्न्यास लिएको बताएका हुन् । मेसीले राष्ट्रिय टोलीबाट आफ्नो खेलजीवन सकिएको बताएका थिए । ‘राष्ट्रिय टोलीबाट मेरो खेलजीवन सकिएको छ, ' उनले भने ।
पछिल्लो पुस्ताकै उत्कृष्ट खेलाडीमध्येका एक मेसीलाई राष्ट्रका लागि खेल्न नसकेको आरोप लाग्दै आइरहेको थियो । सुरुबाटै उनको समर्थनमा रहेका अर्जेन्टिनी महान् फुटबलर डिएगो म्याराडोनाले समेत पछिल्लो समय मेसीको आलोचना गर्न थालेका थिए ।
कोपा अमेरिका सुरु हुनुअघि म्याराडोनाले मेसीसँग नेतृत्व गर्न सक्ने क्षमता नरहेको बताएका थिए । ‘मेसी वास्तवमै राम्रा खेलाडी हुन् तर, उनीसँग टोलीको नेतृत्व गर्न सक्ने क्षमता छैन', म्याराडोना भन्छन् ।
यद्यपि मेसीले आफ्नो कप्तानीमा अर्जेन्टिनालाई पछिल्लो तीन महत्वपूर्ण प्रतियोगिताको फाइनलमा पुर्याएका छन् । तर अर्जेन्टिना ती प्रतियोगिताको फाइनलमा अतिरिक्त समय र टाइब्रेकरमा उपाधिबाट चुक्दै आइरहेको छ । त्यसैले अर्जेन्टिना पछिल्लो २३ वर्षयता अन्तर्राष्ट्रिय उपाधिविहीन छ ।
पाँच पटकका फिफा वर्ष खेलाडी मेसीले अर्जेन्टिनालाई सन् २०१४ को फिफा विश्वकप, गत वर्षको कोपा अमेरिका र यो वर्षको कोपा अमेरिकाको फाइनलमा पुयाएका थिए । यी तीनवटै प्रतियोगितामा अर्जेन्टिनाले उपाधि हात पार्न सकेन ।
यसबाहेक मेसीले सन् २००७ को कोपा अमेरिकामा समेत प्रतिस्पर्धा गरेका थिए । ब्राजिलस“ग ३-० ले पराजित भएको सो फाइनलसहित मेसीले अर्जेन्टिनी राष्ट्रिय टोलीबाट चार फाइनल गुमाइसकेका छन् ।
सन्न्यासको निर्णयसँगै अर्जेन्टिनाका लागि सर्वाधिक गोल गर्ने खेलाडी मेसीको देशलाई अन्तर्राष्ट्रिय उपाधि दिलाउने योजना भने अधुरै रहने भएको छ । उनले राष्ट्रिय टोलीबाट ५५ गोल गरेका छन् ।
मेसी राष्ट्रका लागि भन्दा क्लबका लागि निकै सफल खेलाडी हुन् । स्पेनिस क्लब बार्सिलोनाबाट व्यावसायिक फुटबल खेल्दै आइरहेका मेसीले क्लबबाट जति सफलता हात पारे अन्य खेलाडीले सायदै त्यो सफलता हात पारेका छन् । क्लब फुटबलमा अत्यधिक सफल मेसीले आफूमाथि लागेको राष्ट्रका लागि असफल खेलाडीको ट्याग हटाउन भने असफल रहे ।
सेर्जियो र मार्सेरानोले समेत अर्जेन्टिनाका लागि नखेल्ने
विश्व फुटबलका स्टार लियोनल मेसीले अर्जेन्टिनाको राष्ट्रिय टिमबाट नखेल्ने घोषणा गरे लगत्तै अर्जेन्टिनाको फुटबल टिम छिन्न भिन्न भएको छ ।
सोमबार बिहान कोपा अमेरिकाको फाइनलमा पेनाल्टी सुट आउटमा चिलीले अर्जेन्टिनालाई ४-२ ले हराएपछि अर्जेन्टिनाको फुटबल टिम छिन्न भिन्न भएको हो।
मेसीले पेनाल्टी सुट आउट मिस गरेपछि अन्तराष्ट्रिय फुटबलबाटै सन्यासको घोषणा गरेपछि अर्जेन्टिनाका अन्य स्टाइकरले समेत राष्ट्रिय टिमबाट नखेल्ने घोषणा गरेका छन् ।
अर्जेन्टिनाका अर्का स्ट्राइकर सेर्जियो अग्गेरो र जाभियर मार्सेरानोले समेत राष्ट्रिय टिमबाट नखेल्ने घोषणा गरेका हुन् । सेर्जिया म्यन्चेस्टर सिटी स्ट्राइकर हुन् भने जाभियर बार्सिलोनाका डिफेन्डर हुन् ।
सँगै, अर्जेन्टिनाका चर्चित खेलाडी डिमारिया, हिगुइन, लाभेञ्जी, लुकासलगायतले समेत राष्ट्रिय टिम छोड्ने सम्भावना देखिएको छ ।
राष्ट्रिय टिमबाट सबै चर्चित स्ट्राइकर बाहिरिने बताएको भए पनि अर्जेन्टिनाका प्रशिक्षक टाटा मार्टिनोले भने यस सम्बन्धमा केही बताएका छैनन् ।
प्रतिक्रिया दिनुहोस !
