एजेन्सीः अधिकांश अन्तर्राष्ट्रिय प्रतियोगितामा सबैले आफ्नै देशलाई समर्थन गर्छन् । स्पेनिस टेनिस स्टार गार्बिन मुगुरुजा पनि जारी युरोकप फुटबल प्रतियोगितामा आफ्नै देश स्पेनलाई समर्थन गर्दैछिन् ।
तर स्पेनलाई समर्थन गर्ने उनको शैली भने केही फरक छ । हाल वर्षको तेस्रो ग्रान्डस्लाम टेनिस प्रतियोगिता विम्बल्डनका लागि लन्डनमा रहेकी मुगुरुजा स्पेनिस राष्ट्रिय फुटबल टोलीको जर्सी लगाएर सार्वजनिक कार्यक्रममा पुग्ने गरेकी छिन् ।
उनी सोमबार भएको विम्बलडनको पत्रकार सम्मेलनमा समेत राष्ट्रिय फुटबल टोलीकै जर्सी लगाएर उपस्थित भइन् । युरोकप र स्पेनिस फुटबल टोलीको बारेमा उनले पत्रकारहरूस“ग केही समय गफ पनि गरिन् ।
पत्रकारहरूको जिज्ञासामा मुगुरुजाले स्पेनिसहरू फुटबल भनेपछि हुरुक्कै हुने गरेको प्रतिक्रिया दिइन् । ‘स्पेनिस नागरिक फुटबल भनेपछि हुरुक्कै हुन्छन्', मुगुरुजाले भनिन्, ‘स्पेनमा यदि तपाईं फुटबल हेर्नुहुन्न भने कतिपय स्थितिमा तपाईंलाई मरेतुल्य हुने अवस्थासमेत सिर्जना हुनेछ । तपाईंस“ग कोही बोल्न रुचाउने छैनन् ।'
मुगुरुजाले आफू स्पेनिस टोलीको समर्थक भएको र राष्ट्रिय टोलीको अधिकांश खेल हर्ने गरेको पनि बताइन् । ‘स्पेनका प्रायः खेलहरू हेर्ने गरेकी छु ।
फुटबल हेरेर बस्दा आफ्नो खेलको तयारीमा पनि केही मुस्किल पर्ने गरेको छ', उनले भनिन्, ‘तर समय मिलाएर हेर्ने गरेकी छु ।' उनले स्पेनिस फुटबल टोलीमा आफूलाई रक्षक सर्जियो रामोस र मिडफिल्डर आन्द्रेस इनिएस्टा मनपर्ने खेलाडी भएको पनि बताइन् ।
‘मलाई रामोस मन पर्छ । साथै इनिएस्टा पनि मन पर्छ', मुगुरुजाले भनिन् । अघिल्लो महिनामात्रै ग्रान्डस्लाम टेनिस फ्रेन्च ओपनको उपाधि जितेकी मुगुरुजालाई विम्बल्डनमा पनि उपाधिको दाबेदारका रूपमा हेरिएको छ ।
प्रतिक्रिया दिनुहोस !
