काठमाडौँ: माओवादी केन्द्रका अध्यक्ष पुष्पकमल दाहाल ‘प्रचण्ड' र अष्ट्रेलियाका राजदूत ग्लेन ह्वाइटबीच मंगलबार भेटवार्ता भएको छ ।
भेटमा राजदूत ग्लेनले अध्यक्ष प्रचण्डको अष्ट्रेलिया भ्रमण रद्ध भएको सम्बन्धमा प्रश्न गरेका छन् । राजदूत ग्लेनले मिडियामा आएजस्तो स्थिति नभएको समेत प्रष्ट पारेका छन् ।
प्रचण्डको भ्रमण स्थगित किन भयो भन्ने विषयमा जिज्ञासा राख्दै राजदूत ग्लेनले भने, ‘हामी नियमित अष्ट्रेलियन सरकार, पुलिस र महान्यायाधीवक्ताको सम्पर्कमा छौँ । तपाईंको भ्रमण किन स्थगित भयो ?'
जवाफमा प्रचण्डले समेत मिडियामा आएजस्तै ढंगले भ्रमण स्थगित नभएको बताए । जवाफमा प्रचण्डले भने, ‘वर्तमान राजनीतिक स्थिति, अन्तरिक कामको चापका कारण भ्रमण स्थगित भएको हो ।'
प्रचण्डले राजदूत ग्लेनसँग उपयुक्त समयमा अष्ट्रेलियाको भ्रमण गर्ने समेत बताएका छन् । उनले अष्ट्रेलियामा आम निर्वाचन भइरहेकाले समेत भ्रमण स्थगित गर्नुपरेको बताएको प्रचण्डको निजी सचिवालयले जनाएको छ ।
भेटमा अध्यक्ष प्रचण्डले नेपालको राजनीतिक विकासका बारेमा राजदूत ग्लेनलाई जानकारी गराएका छन् ।
नेपालको राजनीतिक विकास प्रक्रिया विशिष्ट खालको भएको बताउदै प्रचण्डले संविधान कार्यान्वयन गर्न र शान्ति प्रक्रियाका बाँकी कार्यभार पुरा आफू सक्रिय रहेकोमा प्रष्ट पारे ।
प्रचण्डले पछिल्ला राजनीतिक समस्या समाधानका लागि राष्ट्रिय सहमतिय सरकार बनाउने विषयमा पहल भइहरेको जानकारी राजदूतलाई गराएका छन् । उनले राष्ट्रिय सरकारका लागि उच्च राजनीतिक नेतृत्वसँग सकारात्मक छलफल भइरहेको समेत खुलासा गरे । उनले यसका लागि अन्तराष्ट्रिय समूहलाई सकारात्मक सहयोगको निम्ति समेत आग्रह गरेका छन् ।
भेटमा राजदूत ग्लेनले अष्ट्रेलियन सरकारले नेपाल र नेपाली जनतालाई सहयोग गर्दै आइरहेको अवगत गराउदै पुनर्निमाणमा समेत काम गरिरहेको जानकारी गराए । प्रचण्डले भूकम्पपछिको पुनर्निमाणमा अष्ट्रेलियाको सरकारले गरेको सहयोगप्रति धन्यवाद दिए ।
प्रतिक्रिया दिनुहोस !
