काठमाडौंः भूकम्पपीडितको घर पुनर्निर्माणका लागि दिइने रकमबारे जारी विवाद बुधबार टुंगिएको छ । भूकम्पपीडितको घर बनाउन पहिलो किस्तामा डेढ लाख रुपैयाँ दिने कुरामा सत्तारुढ र प्रमुख प्रतिपक्षी दलबीच सहमति जुटेपछि संसद्को अवरोध पनि हट्ने भएको छ ।
सत्तारुढ र प्रतिपक्षीले जारी संसद्को अवरोधलाई विश्व बैंकसँगको परामर्शपछि हटाउने जनाएका छन् । भूकम्पपीडितको घर बनाउन पहिलो किस्तामा २ लाख रुपैयाँ दिन माग गर्दै नेपाली कांग्रेसले ६ दिनदेखि संसद्मा अवरोध गर्दै आएको थियो ।
उसले राहत वितरणमा पनि एमालेले राजनीति गरेको आरोप लगाउँदै आएको थियो । सहमति अनुसार पहिलो किस्तामा डेढ लाख र दोस्रो किस्तामा ५० हजार दिने गरी विश्व बैंकसँग परामर्श गर्नका लागि दुबै पक्ष सहमति भएका हुन् ।
प्रधानमन्त्रीले सम्बोधन गर्ने
बिहान ११ बजेका लागि डाकिएको बैठक सहमति जुटाउन भन्दै दिउँसो २ बजेसम्मका लागि स्थगित गरिएको थियो ।
आजै दिउँसो २ बजे बस्ने संसद् बैठकमा प्रधानमन्त्री केपी शर्मा ओलीले सरकारकातर्फबाट सम्बोधनको तयारी गरेका छन् ।
प्रधानमन्त्रीको सम्बोधनका लागि सत्तारुढ र विपक्षी कांग्रेस दुबै पक्षका नेता सम्बोधनको भाषा मिलाउन जुटेका छन् ।
आज भएको सत्तारुढ र प्रतिपक्षीको बैठकमा प्रधानमन्त्रीले संसद्लाई सम्बोधन गर्ने जानकारी गराएपछि सम्बोधनको भाषाको तयारी भइरहेको छ ।
प्रतिक्रिया दिनुहोस !
