अंकाराः टर्कीका राष्ट्रपति रेसेप तैयप एर्दोगानले रूसका राष्ट्रपति भ्लादिमिर पुटिनले माफी मागेका छन् । गत वर्ष रूसी युद्धक विमान सिरियाली सीमा क्षेत्रमा खसालेको घटनाप्रति उनले माफी मागेका हुन् ।
यसअघिसम्म एर्दोगानले रूससँग माफी नमाग्ने भन्दै हठ प्रदर्शन गरेका थिए । उनले रूससँग माफी माग्नुको साटो त्यसको प्रतिकार गर्ने चेतावनी दिँदै आएका थिए ।
रूसी युद्धक विमान भुलवश टर्कीले अखालेको भन्दै आत्मालोचना गरेका छन् । रूसी राष्ट्रपतिको कार्यालयका प्रवक्ताले टर्कीका राष्ट्रपतिले माफी मागेको खुलासा गरेका छन् ।
क्रेमलिनका प्रवक्ता दमित्री पेस्कोभले सोमबार भने, ‘टर्कीका राष्ट्रपतिले राष्ट्रपति भ्लादिमिर पुटिनलाई सन्देश पठाई माफी मागेका छन् । सन्देशमा टर्कीका राष्ट्रपतिले रूसी युद्धक विमानका चालक र उनका परिवारप्रति सहानुभूति एवं समवेदना प्रकट गरेका छन् । यसका साथै उनले राष्ट्रपति पुटिनसँग माफी पनि मागेका छन् ।’
एर्दोगानले रूससँगको सम्बन्ध सुधार्न आफूले सबै प्रकारका प्रयास गर्ने वचन पनि दिएका छन् । यसै विषयलाई लिएर रूसले पनि उक्त घटनासँग सम्बद्ध विज्ञप्ति जारी गरेको छ ।
विज्ञप्तिमा उल्लेख छ, ‘टर्कीले आफूले जानीजानी नभई गल्तीवश हाम्रो युद्धक विमान खसाएको स्वीकार गरेको छ । टर्किस राष्ट्रपति एर्दोगानका प्रवक्ता इब्राहिम कालिनले पनि यसको पुष्टि गरेका छन् । एर्दोगानले राष्ट्रपति गल्ती स्वीकार गर्दै पुटिनलाई चिठी पनि लेखेका छन् ।’
एर्दोगानका सल्लाहकार कालिनले पनि चिठीको सुरुमै आफूलाई माफी दिनुपर्ने लेखेको पुष्टि गरेका छन् ।
गत वर्ष रूसी विमान खसालेपछि टर्कीले माफी नमाग्ने बताएको थियो । उक्त घटनामा कुनै पछुतो पनि नभएको बताएको थियो । सन् २०१५ को नोभेम्बर सिरियाली सीमा क्षेत्रमा उक्त विमान खसालिएको थियो ।
यसै विषयलाई लिएर विवाद बढ्दै गएपछि दुई देशबीच कूटनीतिक सम्बन्ध विच्छेद गरिएको थियो । टर्कीले पश्चिमासँग मिलेर रूसलाई नटेर्ने नीति लिएको थियो । हाल आएर टर्कीले रूससँगको सम्बन्ध सामान्य बनाउन खोजेको छ ।
टर्कीका राष्ट्रपति रेसेप तैयप एर्दोगानले माफी मागेपछि बुधबार रूसी राष्ट्रपति भ्लादिमिर पुटिनले आफ्ना समकक्षी एर्दोगानलाई फोन गर्ने भएका छन् ।
प्रतिक्रिया दिनुहोस !
