डम्बरसिंह गुरुङ
युरोकपका खेलहरू अहिलेसम्म निकै प्रतिस्पर्धात्मक भएका छन् । जारी युरोकपमा मेरो रोजाइको टिम क्रोसिया हो । क्रोसियामा अरू देशको जस्ता नाम चलेका खेलाडी छैनन् । तर क्रोएसियाका खेलाडीमा सामूहिक भावना निकै राम्रो थियो ।
राम्रो खेलेर पनि क्रोएसिया प्रिक्वार्टरफाइनलबाटै बाहिरिएपछि जर्मनी मेरो दोस्रो रोजाइमा परेको छ । तर जर्मनीको आक्रामक खेलले मलाई लोभ्याउँछ । जर्मनी युरोकपको फाइनलमा पुग्छजस्तो लाग्छ ।
जर्मनीसँग फाइनलमा बेल्जियमको भिडन्त पर्लाजस्तो लाग्छ । बेल्जियमले पनि राम्रो खेल प्रदर्शन गरिरहेकाले फाइनलमा पुग्ने विश्वास छ । हुन त आयोजक फ्रान्स र इटालीले पनि राम्रो खेल्दैछन् । तर बेल्जियमको प्रदर्शन निकै स्तरीय छ ।
समूहगत चरणको खेलमा धेरै गोल हुन सकेन । जति कम गोलअन्तरले जित हार हुन्छ त्यति नै खेल राम्रो र प्रतिस्पर्धात्मक हुन्छ । त्यसैले समूहगत चरणका खेल निकै प्रतिस्पर्धात्मक थिए ।
युरोकपजस्तो प्रतिस्पर्धामा धेरै गोलअन्तरले हारजित हुनु भनेको राम्रा होइन । जारी युरोकपबाट हाम्रा फुटबल खेलाडीले पनि धेरै कुरा सिक्न सक्नुपर्छ ।
खेलाडीको खेल्ने शैली, राष्ट्रका लागि टिम वर्क, पछिल्लो समय विश्व फुटबलमा भित्रिएका प्रविधिजस्ता कुरालाई हामीले नजिकबाट नियाल्न सक्नुपर्छ र ती कुरालाई आफ्नो खेलजीवनमा व्यवहारमा समेत उतार्न सक्नुपर्छ ।
हाम्राभित्र घमण्ड गर्ने तर, मेहनत नगर्ने समस्या छ । यसलाई सुधार नगरेसम्म नेपालको फुटबलको विकास हुँदैन । हाम्रा खेलाडीमा घमण्ड र एटिच्युट सबैभन्दा ठूलो समस्या हो । त्यसमा सुधार ल्याउन युरोकपबाट धेरै कुरा सिक्ने सकिन्छ ।
मैले क्लब फुटबल बढी हेर्न रुचाउँछु । क्लब फुटबलबाट व्यावसायिकताका कुराहरू राम्ररी सिक्न सकिन्छ । फेरि क्लब फुटबलमा नाम चलेका खेलाडीले नै राष्ट्रिय टोलीबाट युरोकप, विश्वकप, कोपा अमेरिकाजस्ता ठूला प्रतियोगिता खेल्ने हुन् ।
मलाई साथीभाइसँग बसेरभन्दा पनि एक्लै फुटबल हेर्ने मनपर्छ । साथीभाइसँग हेर्दा उनीहरू रमाइलो गर्न खोज्छन् जसले गर्दा खेलाडीको क्षमतालाई गहिरिएर हेर्न पाइँदैन । खेलाडीले बल कति लामो समयसम्म पोसेसनमा राख्छन्, बल कसरी अघि बढाउँछन्, साथीलाई पास दिँदा कस्तो कुरामा ध्यान दिन्छन् भन्नेजस्ता कुरा मेरो रोजाइमा पर्छ । (राष्ट्रिय टोलीका पूर्वखेलाडी डम्बरसँग कृष्णमणि बरालले गरेको कुराकानीमा आधारित ।)
प्रतिक्रिया दिनुहोस !
