एजेन्सीः जारी युरोकप फुटबलको क्वार्टरफाइनल खेलहरू शुक्रबार बिहानदेखि सुरु हुँदैछन् । पोल्यान्ड, आइसल्यान्ड र वेल्स पहिलोपटक युरोकपको क्वार्टरफाइनलमा पुगेका हुन् ।
आइसल्यान्ड र वेल्सको त युरोकपमै यो पहिलो सहभागिता हो । अन्य पाँच टोलीले भने विगतमा पनि क्वार्टरफाइनलको अनुभव लिइसकेका छन् । यी टोलीले विगतमा क्वार्टरफाइनलमा रोकिएको र अगाडि बढेको तथ्य यतिबेला सान्दर्भिक हुन्छ ।
फ्रान्सले युरोकपमा सन् २००० को संस्करणपछि क्वार्टरफाइनल पार गर्न सकेको छैन । १६ वर्षअघि युरोकपको विजेता बनेको फ्रान्स त्यसपछिका संस्करणमा तीन पटक क्वार्टरफाइनल र एकपटक समूहगत चरणबाटै बाहिरियो । फ्रान्स सन् १९८४ मा पनि विजेता बनेको थियो । त्यसबाहेक युरोकपमा फ्रान्सले एकपटक मात्र सेमिफाइनलको यात्रा तय गरेको छ ।
फ्रान्स यसपटक युरोकपको आयोजक भएकाले पनि बढी दबाबमा छ । सन् २०१२ को युरोकपको क्वार्टरफाइनलमा फ्रान्सलाई स्पेनले २-० गोलले हराएको थियो ।
सन् २००४ मा पनि क्वार्टरफाइनल पुगेको फ्रान्सेली टोली ग्रिससँग १-० गोलको अनपेक्षित हार व्यहोरेपछि उपाधि होडबाट बाहिरिएको थियो । यी दुवै संस्करणमा फ्रान्सलाई हराउने टोली नै पछि गएर प्रतियोगिताको विजेता बनेका थिए ।
इटालीले यसअघि युरोकपमा आठ पटक प्रतिस्पर्धा गरेकामा एक पटक विजेता र दुई पटक उपविजेता बनेको छ । दुई पटक सेमिफाइनलमा पुगेको इटाली एकपटक क्वार्टरफाइनल र दुईपटक समूहगत चरणबाट बाहिरियो ।
पूर्व विश्वविजेतासमेत रहेको इटाली सन् २००८ को युरोकपमा क्वार्टरफाइनलमा स्पेनसँग टाइब्रेकरमा पराजित भएको थियो । अन्ततः उक्त संस्करणमा स्पेन नै विजेता बनेको थियो ।
विश्वविजेता बनेको दुई वर्षपछि इटाली युरोकपको क्वार्टरफाइनलबाटै बाहिरिनुलाई आश्चर्यजनक रूपमा हेरिएको थियो ।
सन् १९९६ यता लगातार युरोकप खेलिरहेको इटाली यसक्रममा दुई पटक उपविजेता बन्यो भने दुई पटक समूहगत चरणबाटै बाहिरिएको थियो । युरोपियन फुटबलमा स्पेन र जर्मनीको वर्चस्व ठूलो छ । यी दुवै टोलीले यो प्रतियोगिता सर्वाधिक तीनतीन पटक जितेका छन् ।
तर विश्वकपमा चारपटक विजेता बनेको जर्मनीको इतिहास विशेष छ । यसअघि ११ पटक युरोकप खेलेको जर्मनी यसक्रममा तीनपटक विजेता बन्यो भने तीनपटक उपविजेता बन्यो ।
दुईपटक सेमिफाइनलमा सीमित भएको जर्मन टोली तीनपटक समूहगत चरणबाटै बाहिरिएको छ भने हालसम्म क्वार्टरफाइनलमा निराश हुनु परेको छैन । सन् २००० र सन् २००४ को संस्करणमा समूहगत चरणबाट बाहिरिएको जर्मनी सन् २००८ मा उपविजेता बन्यो भने सन् २०१२ मा सेमिफाइनलमा रोकिएको थियो।
जर्मनी अहिले विश्वविजेता बनेकाले उमाथि सबैको आँखा छ । बेल्जियम यसपटक सशक्त देखिएको छ । १६ वर्षपछि युरोकप खेलिरहेको बेल्जियम यसअघि चार पटक यो प्रतियोगितामा सहभागी हुने क्रममा एकपटक उपविजेता बन्यो भने एकपटक सेमिफाइनलमा रोकियो ।
दुईपटक भने समूहगत चरणबाटै बाहिरिएको थियो । सन् १९७२ मा सेमिफाइनलमा पुगेको बेल्जियम आठ वर्षपछि फाइनलसम्म पुगे पनि उपाधि जित्न सकेन। त्यसपछि सहभागी भएका सन् १९८४ र सन् २००० को संस्करणमा बेल्जियम पहिलो चरणबाटै घर फर्किएको थियो ।
युरोकपमा पोर्चुगलको इतिहास पनि रोचक छ । पोर्चुगलले यसअघि ६ पटक यो प्रतियोगिता खेलेकामा एक पटक फाइनल, तीन पटक सेमिफाइनल र दुई पटक क्वार्टरफाइनलसम्मको यात्रा तय गरेको थियो ।
पोर्चुगल सन् २००८ को संस्करणको क्वार्टरफाइनलमा जर्मनीसँग ३-२ ले र सन् १९९६ को संस्करणको क्वार्टरफाइनलमा चेक गणतन्त्रसँग १-० गोलले पराजित भएको थियो । पोर्चुगलले सन् १९९६ देखिका हरेक युरोकप संस्करणमा कम्तीमा क्वार्टरफाइनलसम्मको यात्रा तय गरेको छ ।
प्रतिक्रिया दिनुहोस !
