काठमाडौँ: उपप्रधानमन्त्री सीपी मैनालीले माओवादी केन्द्रका अध्यक्ष पुष्पकमल दाहाल ‘प्रचण्ड'लाई प्रधानमन्त्री बन्छु भनेर मुख नमिठ्याउन आग्रह गरेका छन् ।
बिहीबार रिपोर्टस क्लब नेपालको साक्षात्कारमा बोल्दै मैनालीले भने, ‘प्रचण्डले प्रधानमन्त्री बन्छु भनेर मुख नमिठ्याए हुन्छ । सहमतिय सरकार बने कांग्रेस वा एमालेको नेतृत्वमा मात्र बन्न सक्छ ।'
मैनालीले प्रधानमन्त्री बन्ने नै भए प्रचण्डले वर्तमान सरकारको गठबन्धनलाई नै क्रियाशिल बनाउनुपर्ने समेत सुझाए । ‘प्रचण्ड प्रधानमन्त्री बन्ने भए यही गठबन्धनलाई क्रियाशिल बनाएर अगाडि बढ्नुपर्छ,' मैनालीले भने ।
मैनालीले माओवादी केन्द्रप्रति लक्षित गर्दै पार्टी भित्रको समस्या समाधानको लागि गठबन्धन भत्काउनु उचित नहुने तर्क गरे ।
उनले भने,‘पार्टीका मन्त्रीलाई लिएर असन्तुष्टी हो भने उनीहरुलाई फिर्ता बोलाएर अरु पठाए भई हाल्यो नि ! पार्टीको समस्या थोपरेर गठबन्धन भत्काउनुको औचित्य छैन ।'
उनले राष्ट्रियता खतरामा परेको बेला राष्ट्रिय सहमतिको सरकार आवश्यक भए पनि बहुमतीय सरकारको औचित्य नभएको बताए ।
‘एउटा बहुमतीय सरकारको ठाँउमा अर्को बहुमतीय सरकार गठनमा लाग्नुको औचित्य छैन्,' मैनालीले भने, ‘अहिले नै सरकारको विकल्प खोज्ने बेला समेत भएको छैन् ।'
उनले यही सरकारलाई शसक्त बनाउन प्रतिपक्ष र सत्तारुढ गठबन्धनबाट उठिरहेका आवाजलाई सम्बोधन गर्नुपर्नेमा जोड दिए ।
प्रतिक्रिया दिनुहोस !
