बेसीशहरः लमजुङको भोटेवडारमा दिउँसै बाघ पसेर पाँच जनालाई घाइते बनाएको छ । एक प्रहरीसहित तीन स्थानीयबासी र एक मजदुर बाघको आक्रमणबाट घाइते भएका हुन् ।
बाघको आक्रमणमा परी सुन्दरबजार–३, फुलवारीका गोपाल डौलीया, सुन्दरबजार–४ फेदीकुनाका भरत तामाङ, शारदानगर–७, सल्यानका छविलाल बुढाथोकी र सुन्दरबजार–३ फुलवारीकैको रमेश परियार घाइते भएका छन् । उनीहरुको लमजुङ जिल्ला सामुदायिक अस्पतालमा उपचार भईरहेको छ । घाइते भएका ईलाका प्रहरी कार्यालय भोटेवडारमा कार्यरत प्रहरी सहायक निरीक्षक गोलकुमार श्रेष्ठको भने मस्र्याङ्दी मेकिडल सिउँडीबारमा उपचार भईरहेको छ ।
घाईतेहरुको टाउको, हात लगायतका स्थानमा चोट लागेको छ । उनीहरुको अवस्था सामान्य रहेको उपचारमा संलग्न चिकित्सकले बताएका छन् । भोटेवडारको फेदीकुनादेखि बाघले आक्रमण गरेको थियो । त्यहाँ दुईजना घाईते भएका थिए ।
दिउँसो पौने एघार बजेदेखि बाघ शहर छिरेर आक्रमण गर्न थालेको ईलाका प्रहरी कार्यालय भोटेवडारका एक प्रहरी अधिकारीले जानकारी दिए ।
फेदीकुनामा आक्रमण गरेको बाघले पुनः फुलवारीमा पुगेर स्थानीयलाई आक्रमण गरेको थियो । ‘घर नजिकैको अम्रिसोको झ्याङमा लुकेको रहेछ' घाईते गोपाल डौलियाले अन्नपूर्णसँग भने,‘मान्छे देख्ने बित्तिकै एक्कासी झम्टियो ।'
स्थानीयलाई बाघले आक्रमण गर्न थालेपछि पुगेको प्रहरीलाई पनि बाघले आक्रमण गरेको हो । पटक पटक बाघले आक्रमण गर्न थालेपछि त्यस क्षेत्रका स्थानीय त्रसित छन् ।
प्रतिक्रिया दिनुहोस !
