काठमाडौंः इङ्लिस क्लब म्यानचेस्टर युनाइटेडले विश्वचर्चित स्वीडेनका स्ट्राइकर ज्लाटान इब्राहिमोबिकलाई यो सिजनका लागि क्लबमा अनुबन्ध गरेको छ ।
म्यानचेस्टर युनाइटेडले इब्राहिमोबिकलाई फ्रान्सेली क्लब पेरिस सेन्ट जर्मेनबाट भित्र्याएको हो । इब्राहिमोबिकको मेडिकल परीक्षण शुक्रबार भएपछि ३४
वर्षीय यी भेट्रान खेलाडीको अनुबन्धको औपचारिक घोषणा हुनेछ । यो कुराको पुष्टि इब्राहिमोबिकले इन्स्टाग्रामको आफ्नो आधिकारिक एकाउन्टमार्फत गरेका हुन् ।
उनी प्रतिसाता २ लाख पाउन्ड पारिश्रमिक पाउने गरी म्याचेस्टर युनाइटेडमा आवद्ध भएका बेलायती सञ्चारमाध्यमले जनाएका छन् ।
चेल्सीमा फ्लप भएका जोजे माउरिन्होलाई प्रशिक्षक बनाएपछि इब्राहिमोबिकलाई भित्र्याउने चर्चा शुरु भएको थियो ।
सन् १९८१ अक्टोबर ३ मा जन्मेका उनले हालसम्म आयक्स, युभेन्टस, इन्टरमिलान, बार्सिलो, एसी मिला र पेरिस सेन्ट जर्मेनबाट व्यवसायिक फुटबल खेलिसकेका छन् ।
इब्राहिमोबिकको सम्भवत अन्तिम अन्तर्राष्ट्रिय फुटबल प्रतियोगिता युरोकप भने सुखद रहन सकेन । उनको देश स्वीडेन समूह चरणबाटै बाहिरिइसकेको छ ।
इब्राहिमोबिहकले अहिलेसम्म विभिन्न क्लबहरुका लागि खेलेका ६ सय ७७ खेलमा ३ सय ९२ गोल गरिसकेका छन् । त्यसैगरी स्वीडेनका लागि खेलेका ११६ खेलमा ६२ गोल उनको नाममा रहेको छ ।
अहिलेको समकालिन फुटबलमा लियोनेल मेसी र क्रिस्टियानो रोनाल्डोपछि सफल फुटबलर मानिने इब्राहिमोबिकले आफ्नो फुटबल करिअरमा युइएफए सुपर कप, लिग वान, इटालियन सुपर कप, फिफा विश्व क्लब फुटबल कप र सिरिएसहित क्लबस्तरका ठूला उपाधि चुमिसकेका छन् ।
गत सिजन पीएसजीलाई लिग वान फुटबल प्रतियोगिताको उपाधि जिताएका उनलाई प्रशिक्षक माउरिन्होले विगत दुई सिजन खस्केको म्यानचेस्टर युनाइटेडको छबि उकास्नका लागि अग्रपंक्तिको जिम्मेवारीका लागि ल्याएका हुन् ।
प्रतिक्रिया दिनुहोस !
