धरानः धरानका गुण्डा नाइके सन्तोष विकको खुकुरी प्रहारबाट संघीय लिम्बुवान पार्टीका दुई कार्यकर्ता गम्भीर घाइते भएका छन् ।
विकको खुकुरी प्रहारबाट संघीय लिम्बुवान पार्टीका कार्यकर्ताहरु धरान–१७ निवारी ३७ वर्षीय वर्षीय सञ्जय कुमार राई र धरान १५–का २६ वर्षीय प्रज्वल लिम्बू (प्रकाश) गम्भीर घाइते भएका छन् ।
खुकुरी हानेपछि विक फरार रहेको इलाका प्रहरी कार्यालय धरानका डिएसपी ढकेन्द« खतिवडाले बताए । विक कांग्रेस महाधिवेशन प्रतिनिधि र बिपी कोइराला स्वास्थ्य विज्ञान प्रतिष्ठानको सुरक्षाको ठेक्का पाएको केटीएम सेक्युरिटी प्रालीका कर्मचारी पनि हुन् । विकले बुधवार राति लिम्बुवान कार्यकर्तालाई खुकुरी प्रहार गरेका थिए । तर घटना शुक्रवार मात्र सार्बजनिक भएको हो ।
दुई वर्ष अगाडि लिम्बुवान छाडेर कांग्रेस प्रवेश गरेका विक धरानमा गुण्डागर्दीको आडमा असुलीमा संलग्न रहेका प्रहरीले बताएको छ । लिम्बुवान छाडेर कांग्रेस प्रवेश गरेदेखि नै लिम्बुवानसँग असन्तुष्टि जनाउदै आएका विकले पुरानो रिसिवीका कारण लिम्बुवान कार्यकर्ताहरुलाई घाइते बनाएको लिम्बुवान पार्टीले दाबी गरेको छ ।
लिम्बुवानका केन्द्रीय अध्यक्ष कुमार लिङ्देनले आफ्ना कार्यकर्तामाथि खुकुरी प्रहार गरी घाइते बनाउने गुण्डा नाइके विकलाई तत्काल पक्राउ गरी कारबाही गर्न माग गरेका छन् ।
घाइते लिम्बुवान कार्यकर्ताहरुको बिपी प्रतिष्ठानमा उपचार भैरहेको छ । घाइतेमध्य प्रज्वलको अवस्था गम्भीर रहेको बताइएको छ । दुबैजनाको टाउको र शरिरका विभिन्न भागमा चोट लागेको छ ।
विक लगायत खुकुरी प्रहार गर्नेहरुमाथि पीडितहरुले इलाका प्रहरी कार्यालय धरानमा ज्यान मार्ने उद्योग ऐन अन्र्तगत किटानी जाहेरी दिएका छन् ।
लिम्बुवान कार्यकर्तामाथि खुकुरी प्रहार गर्ने विक लगायतको समुह घटनापछि फरार रहेकाले उनीहरुलाई पक्राउ गर्न प्रहरी परिचालन गरिएको डिएसपी खतिवडाले बताए ।
घटनापछि प्रहरीले विकले सञचालन गरेको मालिङ्गो रेष्टुरेण्ट बन्द गराएको छ । धरानमा राति १० बजेपछि होटल तथा रेस्टुरेण्ट सञ्चालन गर्न प्रहरीले प्रतिबन्ध लगाए पनि विकले गुण्डागर्दीको शैलीमा १२ बजेजम्म रेस्टुरेन्ट चलाउँदै आएका थिए ।
प्रतिक्रिया दिनुहोस !
