पोखरामा पौने ६ किलोको शिशु जन्मियो

पोखराः काजीपोखरी पोखराकी लक्ष्मी गुरुङले झन्डै ६ किलोको शिशु जन्माएकी छन् । चिकित्सकका अनुसार यति धेरै वजनको बच्चा जन्मनु चिकित्साक्षेत्रकै लागि पनि नौलो हो ।

स्याङ्जाको एलादी स्थायी घर भएकी लक्ष्मीको शुक्रबार साँझ रानीपौवा पोखरास्थित साई अर्चना हस्पिटलमा अप्रेसनबाट शिशु निकालिएको थियो ।

अप्रेसनमा संलग्न डा. अर्चना पुनका अनुसार आमा र छोरा दुवै स्वस्थ छन् । सामान्यभन्दा बढी वजनको जन्मिएको हुनाले केही समय निगरानी गर्न बच्चालाई एनआइसीयुमा राखिएको डा. पुनले जानकारी दिइन् ।

‘हाम्रो हस्पिटलमा एनआइसीयु नभएकाले पश्चिमाञ्चल क्षेत्रीय अस्पतालमा राखिएको छ’, उनले भनिन्, ‘बच्चाको तौल ५ किलो ७ सय ५० ग्राम छ ।’ शिशुको लम्बाइ ५७ सेन्टिमिटर रहेको जानकारी पनि डा. पुनले दिइन् ।

लक्ष्मीको गर्भवती जाँच नियमित हुँदै आएको र त्यसबीचमा असामान्य अवस्था कहिल्यै नदेखिएको डा. पुनले बताइन् । ‘भिडियो एक्सरे गर्दा शिशु ४ किलोको हुनुपर्छ भन्ने अनुमान थियो’, उनले भनिन्, ‘तर अझै बढी तौलको जन्मियो ।’

मधुमेह वा थाइराइड भएका आमाबाबुको सन्तानमा असामान्य तौल देखिनसक्ने भए पनि लक्ष्मीमा भने त्यस्तो कुनै बिरामीपन छैन । बच्चामा पनि मधुमेह वा अरु कुनै समस्या नदेखिएको उनले बताइन् ।

लक्ष्मीमा पति होमबहादुर गुरुङका अनुसार अहिले छोरा जन्माएका उनीहरुको यो दोस्रो सन्तान हो । पहिलो सन्तान छोरी १५ महिनाकी छन् । 

ट्याक्सी चलाएर परिवार पाल्दै आएका उनले गर्भवती श्रीमतीको नियमित जाँच गराउँदै आएका थिए । पहिलो सन्तान हुँदा पनि साई अर्चना हस्पिटल लगेको हुँदा यसपालिमा पनि उनले त्यहीं लगेका थिए ।

डाक्टरले साउनमा बच्चा जन्मने मिति दिए पनि केहीअघि लक्ष्मीले व्यथाको महसुस गरेपछि शुक्रबार हस्पिटल लगिएको थियो । शुक्रबार पौने ६ बजे अप्रेसनबाट बच्चा निकालिएको थियो ।

चिकित्सकहरु सामान्यतया साढे २ किलोको बच्चा जन्मनु स्वस्थ नै मान्छन् । लक्ष्मी र होमको जेठो सन्तान छोरी साढे ३ किलोको जन्मिएकी थिइन् ।
‘पहिलाको बच्चा पेटमा हुँदाभन्दा यसपालि अलि भारी भएको भन्थिन्’, उनले भने, ‘अरु त कुनै अप्ठेरो केही थिएन ।’

आमा र बच्चा दुवै स्वस्थ रहेकाले होम खुसी छन् । सामान्यभन्दा धेरै तौलको जन्मिएको भए पनि छोरा स्वस्थ रहेकाले खुसी लागेको उनले सुनाए । गर्भवती हुँदा लक्ष्मीले माछामासु र पोषक तत्व धेरै हुने खानेकुरा अत्यधिक खाने गरेको होमले बताए ।