रोनाल्डो र बेल भिड्ने, कसले बाजी मार्ला ?

काठमाडौंः फ्रान्समा जारी युरोकप फुटबल प्रतियोगितामा स्पेन र इङ्ल्यान्ड जस्ता बलिया टीम समूह चरणमै ढल्दा पोर्चुगल र वेल्स जस्ता टीम अनपेक्षित नतिजासहित अघि बढिरहेका छन् ।

समूह चरणको भिडन्तमा तीनवटै खेलमा बराबरी खेल्दै अन्तिम १६ मा आएको क्रिस्टियानो रोनाल्डोको पोर्चुगल त्यहाँबाट पनि अघि बढेर अन्तिम चारमा पुगिसकेको छ ।

अन्तिम आठका लागि भएको खेलमा क्रोएसियालाई पाखा लगाएको पोर्चुगलले अन्तिम चारका लागि भएको खेलमा पेनाल्टी सुटआउटमा पोल्यान्डलाई पाखा लगाउन सफल भएको छ ।

समूह चरणमा कम्जोर प्रतिद्वन्द्वीहरु हंगेरी, आइसल्यान्ड र अस्ट्रियासँग खेलेको पोर्चुगल धर्मराउँदै तेस्रो स्थानमा रहेर अघि बढेको थियो ।

समूह चरणको पहिलो खेलमा आइसल्यान्डसँग १–१ गोलको बराबरी खेलेको पोर्चुगलले दोस्रो खेलमा अस्ट्रियासँग गोलरहित बराबरी खेल्यो ।

तेस्रो खेलमा रोनाल्डोले दुई गोल गरेपछि हंगेरीविरुद्ध ३–३ गोलको बराबरी खेल्दै उत्कृष्ट चारमा परेको तेस्रो टीम भएर पोर्चुगल अन्तिम १६ मा पुग्यो ।

समूह चरणबाट अघि बढेपछि भने निरन्तर गोल गरिरहेको पोर्चुगल उपाधि भन्दा दुई खेला टाढा छ । समूह चरणमा पेनाल्टीसमेत हान्न चुकेका रोनाल्डोको नेतृत्वमा पोर्चुगलले सेमिफाइनल यात्रा तय गरिसकेको छ ।

अर्कातिर बेलायती संघको देश वेल्स समूह चरणबाट शीर्ष स्थानमा रहँदै अन्तिम १६ मा पुगेको थियो । समूह चरणको पहिलो खेलमा स्लोभाकियालाई ३–० ले हराएको वेल्स दोस्रो खेलमा इङ्ल्यान्डसँग २–१ ले पराजित भयो । तर उसले तेस्रो खेलमा रसियामाथि ३–० कै जित निकाल्दै अन्मि १६ मा पुग्यो ।

यसबीचमा वेल्सका कप्तान ग्यारेथ बेलले तीन गोल पनि गर्न भ्याए । अन्तिम १६ को खेलमा वेल्सले नोर्दन आयरल्यान्डलाई १–० ले पाखा लगायो । समूह चरणबाटै उत्कृष्ट लय समातेको वेल्सले अन्तिम आठमा बेल्जियमविरुद्ध अझ प्रभावशाली खेल देखायो ।

विश्वबरियताको दोस्रो नम्बरको बेल्जियममाथि २६ औँ बरियतामा रहेको वेल्सले ३–१ को जित निकाल्यो । शुरुवातमै गोल खाएर पनि वेल्सले पहिलो हाफमा बराबरी गर्यो भने दोस्रो हाफमा दुई गोल ठोक्दै सेमिफाइनलमा पोर्चुगलसँग भिडन्त पक्का गर्यो । सन् १९५८ पनि युरोपका ठूलो प्रतियोगितको सेमिफाइनलमा पुग्ने क्रममा वेल्सले अविश्वसनीय परिणाम निकाल्यो ।

वेल्सका बेल र पोर्चुगलका रोनाल्डो स्पेनिस क्लब रियल मड्रिडबाट व्यवसायिक फुटबल खेल्छन् । उनीहरु दुईको जिम्मेवारी रियल मड्रिडका लागि गोल गर्ने हो । तर युरोकपको सेमिफाइनल भिडन्तमा भने बेल र रोनाल्डो एकअर्काको पोस्ट्मा गोल गर्ने भूमिकामा उभिएका छन् ।

समूह चरणमा हंगेरीविरुद्धको खेलमा दुई गोल गरेका क्रिस्टियानो रोनाल्डो त्यसयता गोलबिहीन छन् । अर्कातिर समूह चरणमा स्लोभाकियाविरुद्ध बेलले पहिलो गोल गरे । त्यसपछि इङ्ल्यान्डविरुद्ध पनि उनैले गोल गरे तर वेल्स पराजित भयो । रसियाविरुद्धको तेस्रो खेलमा पनि बेल गोल गर्न सफल भए ।

अन्तिम १६ को नोर्दन आयरल्यान्डविरुद्ध खेलमा बेलले नै प्रहार गरेको बल विपक्षी खेलाडीले जोगाउन खोज्दा जाली चुम्न पुग्यो । अन्तिम आठमा बेल्जियमविरुद्धको खेलमा गोल गर्न नसकेपनि उनले आफ्नो देशलाई शानदार जित दिलाउन आक्रमक खेलका लागि सहयोेगी भूमिका खेले ।

अहिलेसम्मका खेल हेर्दा वेल्सले समूह चरणदेखि क्वार्टफाइनलसम्मका पाँच भिडन्तमा विपक्षीविरुद्ध ११ गोल गरिसकेको छ भने ३ गोलमात्रै खाएको छ ।

अर्कातिर पोर्चुगलको अवस्था अलिक फरक छ । उसले समूह चरणबाट क्र्वाटरफाइलनसम्मका भिडन्तमा ७ गोलमात्रै गरेको छ भने ५ गोल पनि खाएको छ ।

यो सिजनको ला लिगामा यी दुई खेलाडीको गोलको कुरा गर्ने हो भने रोनाल्डो अगाडि छन् । रोनाल्डोले ३५ गोल गरेका थिए भने ११ गोलका लागि अवसर मिलाइदिएका थिए । अर्कातिर उनीसँगै खेल्ने बेलले १९ गोल गरेका थिए भने १० गोलका लागि पास मिलाइदिएका थिए ।

विश्वकै महंगा र एकै क्लबका यी दुई खेलाडीबीच बुधबार लियोनमा सेमिफाइनल भिडन्त यसअर्थमा पनि रोचक हुनेछ कि दुबैजना क्लबमा सफल भएर देशका लागि उपलब्धी गर्न सकेका छैनन् ।

क्लबमा सबै उपलब्धी आफ्नो पोल्टामा हालिसकेका रोनाल्डो सेमिफाइनलसम्मको यात्राले हौसिएका छन् भने गतिला देशलाई ढाल्दै अघि बढेका बेल पनि पेरिसमा युरोकपको उपाधि चुम्न आतुर छन् ।