गुडिरहेको बसमा ढुङ्गा लाग्दा दुई घाइते
चितवनः नारायणगढ-मुग्लिन सडकखण्डको कविलास गाविस-८ घुमाउनेमा आज बिहान गुडिरहेको बसमा माथिबाट खसेको ढुङ्गाले लाग्दा बसका चालक र सहचालक घाइते भएका छन् ।
इलाका प्रहरी कार्यालय मुग्लिनले दिएको जानकारीअनुसार गौरबाट काठमाडौँतर्फ जाँदै गरेको ना ५ ख २१६७ नंको बसमा आज बिहान ३ः३० बजेको समयमा ढुङ्गा लागेको हो ।
उक्त घटनामा परी बसका चालक सर्लाही राजघाट-२ निवासी ४० वर्षीय टङ्ककुमार मोक्तान र बसका सहचालक रौतहट चन्द्रनिगाहपुर नगरपालिका-१० निवासी २३ वर्षीय मनोहरकुमार चौधरी घाइते भएका छन् । घाइतेहरुलाई उपचारका लागि काठमाडौँ लगिएको प्रहरीले जनाएको छ ।
यसअघि शुक्रबार पनि उक्त सडकखण्डको चण्डीभञ्ज्याङ गाविस-५ खहरेखोला नजिक ट्रकमाथि ढुङ्गा खस्दा ट्रकका चालक र सहचालक घाइते भएका थिए।
त्यसअघि पहिरो पन्छाउने क्रममा डोजरसमेत पहिरोले पुरिएर क्षतिग्रस्त भएको थियो । त्यस्तै, केही दिनअघि एउटा कार पनि पहिरोले पुरिएको थियो ।
सडक फराकिलो बनाउने कार्य भइरहेको उक्त सडकखण्डमा भित्ता काटिएका कारण पानी पर्नासाथ पहिरो तथा ढुङ्गा खस्ने गर्दछ । रासस
प्रतिक्रिया दिनुहोस !
