गोठमा लागेको आगो निभाउने क्रममा बालिकाको मृत्यु
वीरगन्जः पर्साको तुलसीबर्वा गाविसमा आइतवार बिहान भएको आगलागीमा एक बालिकाको मृत्यु भएको छ । तुलसीबर्वा गाविस–७ का मनोज हजराकी १४ वर्षीया छोरी रिंकु कुमारी हजराको आगोले जलेर मृत्यु भएको हो ।
छिमेकी सिकेन्द्र हजराको गोठमा बिहान ११ बजे तिर लागेको आगो निभाउने क्रममा रिंकु कुमारीको मृत्यु भएको प्रहरीले जनाएको छ ।
गोठमा लामखुटटे धपाउन बालिएको घुरबाट सल्किएर लागेको आगो निभाउने प्रयास गरिरहेका बेला रिंकु माथि गोठको छानो खस्दा उनी गोठ भित्रै जलेको स्थानीयवासीले बताएका छन् ।
रिंकुको विहे चार दिनपछि हुने तय भएको थियो । गोठमा लागेको आगो सशस्त्र प्रहरी बोर्डर आउट पोष्ट भिस्वाबन्जारी र स्थानीयवासी गाँउलेले मिलेर निभाएको जिल्ला प्रहरी कार्यालय पर्साले जनाएको छ ।
रिंकुको शव अहिले घटनास्थलमै रहेको र इलाका प्रहरी कार्यालय पोखरीयाबाट प्रहरी निरीक्षक चक्रबहादुर शाहको नेतृत्वमा प्रहरी टोली घटनास्थलमा पठाइएको प्रहरी नायव उपरिक्षक होविन्द्र बोगटीले जानकारी दिए ।
प्रतिक्रिया दिनुहोस !
