ज्यानको बाजी थापेर भिर महको जोहो
जुम्लाः रोकायावाडा-२ मुल्सामका कृष्णबहादुर शाही यतिबेला भिर मह बेच्न व्यस्त छन् । भिर मह सङ्कलन गर्नु निकै जोखिमपूर्ण मानिन्छ ।
भिरमा मौरीले निर्माण गर्ने मह र यसको चाका ल्याउन सबैले सक्दैनन् । भिरमा रेजु (डोरी) र त्यसको बीच बीचमा काठ हाली मुखमा मुकुन्डो, हातमा पञ्जा लगाएर भिर मौरीको मह सङ्कलन गरिन्छ ।
‘साहस गर्न नसक्नेले भिर मह सङ्कलन गर्न सक्दैनन्,’ शाहीले भने। बर्सेनि मुल्सामका विभिन्न ठाउँमा भिर मह सङ्कलन गरिन्छ ।
सङ्कलन गरिएको मह जुम्ला, जाजरकोट, दैलेख, कालिकोट र सुदूरपश्चिमका विभिन्न जिल्लामा बिक्री गर्न लैजाने गरेको शाहीले बताउनुभयो ।
यतिबेला शाहीले ६० किलो भिर मह बिक्री गर्न जिल्लाका विभिन्न ठाउँमा पुर्याएका छन् । उनले मह प्रतिकिलोएक हजारमा बिक्री गरिरहेका छन् । रक्तचाप, मुटु दुख्नेलगायत रोगको उपचारमा भिर महको प्रयोग गरिन्छ । असार महिनाभरीमा ६० हजार आम्दानी गर्ने शाहीको लक्ष्य छ ।
वैशाख र जेठमा जोखिम मोलेर भिर मह सङ्कलन गर्ने गरेको रोकायावाडा-२ कै अर्का मह व्यापारी टेकबहादुर बोहोरा बताउछन् ।
यस क्रममा कतिपयले ज्यान समेत गुमाएका छन् । भिर मह सङ्कलन गरी स्थानीयले छोराछोरीलाई पढाइको खर्च जुटाउँदै आएका छन् । रासस
प्रतिक्रिया दिनुहोस !
