फ्रान्स युरोकपको सेमिफाइनलमा
एजेन्सीः फ्रान्स युरोकप फुटको सेमिफाइनलमा पुगेको छ । आइतबार राति सम्पन्न खेलमा आइसल्यान्ड विरुद्ध ५–२ को फराकिलो जीत दर्ता गर्दै फ्रान्सले सेमिफाइनलको यात्रा तय गरेको छ ।
फ्रान्सलाई जिताउन ओलभर जिरउडले दुई गोल गरेका थिए भने दिमिबी पेयट, पउल पोग्बा र एन्टोनियो ग्रिजम्यानले एक एक गोल गरे ।
रातिको खेलमा फ्रान्सले पहिलो हाफ मै ४–० को अग्रता लिएको थियो । खेलको १२ मिनेटमा जिरउडले खाता खोलेका थिए । त्यसपछि १९ मिनेटमा पोग्बाले दोस्रो गोल गरे । त्यस्तै पेयट ४२ मिनेटमा एक गोल गरे भने ४५ औं मिनेटमा ग्रिजम्यानले एक गोल थपेर पहिलो हाफ मै फ्रान्सले ४ गोल गरेको थियो ।
पहिलो हाफमा कुनै गोल गर्न नसकेको आइसल्याण्डले ५६ औं मिनेटमा खाता खोल्यो । पहिलो गोल कोल्बिएन सिग्थोर्सनले गरेका थिए ।
आइसल्याण्डले गोल गरेको तीन मिनेट बित्न नपाउँदै फ्रान्सका जिरउडले अर्को गोल थपे ५९ मिनेटमा गरेको गोलपछि फ्रान्स ५–१ को अग्रतामा पुग्यो ।
८५ औ मिनेटमा बिरकिर बियारनासनले थप गोल गर्दै आइसल्याण्डका लागि दोस्रो गोल गरेका थिए । यो सँगै खेल ५–२ को अन्तरमा सकियो ।
फ्रान्सले फाइनल प्रवेशका लागि अब जर्मनीको सामना गर्नेछ ।
प्रतिक्रिया दिनुहोस !
