साउदीमा अमेरिकी वाणिज्यदूत नजिकै विस्फोट
काठमाडौं: साउदी अरबस्थित अमेरिको वाणिज्य दूतावासको कार्यालय नजिकै एक आत्मघाती हमलाकारीले आक्रमण गरेका छन् ।
साउदी अरबबाट सूत्रलाई उधृत गर्दै अन्तर्राष्ट्रिय सञ्चारमाध्यमले सम्प्रेषण गरेको समाचार अनुसार पश्चिमी सहर जेद्दाहमा रहेको अमेरिकी वाणिज्य दूतावास नजिकै एक आत्मघाती हमलाकारीले आफूलाई बमले उडाएका हुन् ।
केही अन्तर्राष्ट्रिय सञ्चारमाध्यमका अनुसार यो घटनामा दूतावासको सुरक्षामा संलग्न दुईजना सुरक्षागार्डहरु पनि घाइते भएका छन् ।
अरब न्युज वेबसाइटका अनुसार आक्रमण भएको सहर जेद्दाहमा कयौं देशका राजदूतावास र वाणिज्य दूतावास रहेका छन् ।
आक्रमण भएको स्थान नजिकै जेद्दाहकै सबैभन्दा ठूलो अस्पताल पनि रहेको छ ।
समाचार अनुसार आक्रमणकारी बिरामी बनेर अमेरिकी वाणिज्य दूतावासतर्फ गइरहेका थिए । तर सुरक्षाकर्मीले उनीमाथि शंका लागेर रोक्न खोजेका थिए । जब सुरक्षाकर्मीले उनलाई रोक्न खोजे तब ती आक्रमणकारीले आफूलाई बमले उडाए ।
घटना हुनेबित्तिकै यो इलाकामा तत्कालै आवतजावतमा रोक लगाइएको छ। घटनापछि जेद्दाहमा सुरक्षाकर्मीले अन्य आक्रमणकारीको खोजी गरिरहेको छ । साउदी अरब र अमेरिकाले यो घटनाबारेमा अहिलेसम्म केही बोलेका छैनन् ।
ओकाज न्युज वेबसाइटका अनुसार आत्मघाती आक्रमणकारी कारबाट मस्जिदतर्फ गइरहेका थिए । यो मस्जिद अमेरिकी वाणिज्य दूतावास नजिकै छ ।
समाचार अनुसार हमलाको खबर आउनेबित्तिकै अमेरिकाले आफ्नो दूतावासका सबै कर्मचारलाई अर्को स्थानमा सारेको थियो ।
केही दिनयता संसारभर चरमपन्थीले आक्रमण तीब्र पारेका छन् ।ढाकामा गत शुक्रवार राति कुटनीतिक क्षेत्र रहेको क्याफेमा भएको आक्रमणमा कम्तिमा २० जना विदेशी मारिए ।
न्यूयोर्कको सेन्ट्रल पार्कमा भएको विस्फोटमा एकजना घाइते भए । बगदादमा आइतबार रमजानको किनमेलका लागि आएका मानिसले भरिएको बजारमा आक्रमण हुँदा कम्तिमा १२० जना मारिए ।
सन् २००४ मा पनि यहीँको अमेरिकी वाणिज्य दूतावासमा चरमपन्थीहरुले हमला गर्दा कम्तिमा १० जना मानिस मारिएका थिए ।
प्रतिक्रिया दिनुहोस !
