चीनले बनायो उडनतस्तरी खोज्ने विश्वकै ठूलो टेलिस्कोप

बेइजिङ: चीनमा संसारकै सबैभन्दा ठूलो टेलिस्कोप बनाउने काम पुरा भएको छ । १८५ मिलियन डलरमा बनाइएको यो टेलिस्कोपमा ४ हजार ५ सय प्यानल लगाइएको छ ।

यो टेलिस्कोपबाट उडनतस्तरी अर्थात एलियन्सको उपस्थितिबारे पत्ता लगाउन सकिनेछ । ५ सय मिटरको गोलाकार टेलिस्कोपको अन्तिम प्यानल हालै जडान गरिएको छ।

चीनको राज्य नियन्त्रित टेलिभिजन सीसीटीभीका अनुसार आगामी सेप्टेम्बरबाट यसले आफ्नो काम थाल्नेछ । १८५ मिलियन डलरमा बनेको यो टेलिस्कोप दक्षिण पश्चिम चीनको गुईझोऊ प्रान्तमा लगाइएको हो ।

१.६ किलोमिटर डायमिटर भएको यो टेलिस्कोपमा ४ हजार ५ सय वटा प्यालन जडान गरिएको छ । यो टेलिस्कोप ३० वटा फुटबल ग्राउन्ड जत्रै रहेको छ।

यो टेलिस्कोपले काम गर्न थालेपछि यसबाट अन्तरीक्षमा १ हजार प्रकाश वर्ष टाढासम्मका ताराकोबारेमा सूचना संकलन गर्न सम्भव हुनेछ ।

चीनले यो परियोजना मार्च २०११ मा शुरु गरेको थियो । यसलाई पुरा गर्ने अन्तिम मिति सन् २०१९ सेप्टेम्बरसम्मको थियो । तर यसलाई समयअगावै बनाउने काममा चीन सफल भएको हो ।

टेलिस्कोपको ५ किलोमिटर दायरामा रहने ९ हजार मानिसलाई त्यहाँबाट अन्यत्र सारिएको छ । अहिलेसम्म उत्तरी अमेरिकाको पोर्टो रिकोमा रहेको एरेसिबो अब्जर्भेटरी नै विश्वकै सबैभन्दा ठूलो टेलिस्को थियो । यसको डायमिटर ३ सय मिटरको छ ।

चिनियाँ बैज्ञानिकहरुका अनुसार नयाँ टेलिस्कोपबाट चीनले अन्तरीक्षलाई अझ नजिकबाट बुझ्न र अध्ययन गर्ने क्षमतामा बृद्धि हुने बताएका छन् ।

What makes world's largest ever radio telescope FAST in SW #China's Guizhou so extraordinary? #XinhuaTVhttps://t.co/fLK9CrBlZC

— China Xinhua News (@XHNews) July 2, 2016

वैज्ञानिकहरुका अनुसार यो टेलिस्कोपले कम्जोर रेडियो सिग्नललाई पनि सजिलै पक्रन सक्नेछ । यसका अलाबा अन्तरीक्षका अहिले नदेखिएका भागमा जीवनको उपस्थिति भए नभएको पत्ता लगाउन पनि यो टेलिस्कोपले सहयोग गर्ने छ ।

अर्कातिर अमेरीकी अन्तरीक्ष एजेन्सी नासाको योजनामा अन्तरीक्षमा अहिलेसम्मको सबैभन्दा ठूलो दूरबिन लगाउने रहेको छ । जसले लाखौं माइल टाढासम्म जीवनको सम्भवनाको पत्ता लगाउन सकियोस ।

अत्याधुनिक प्रविधियुक्त लार्ज अपर्चर स्पेस टेलिस्कोप (एटीएलएसटी) यति ठूलो हुनेछ कि रकेटको मद्दत लिन नसकिने भएकाले यसलाई सिधै अन्तरीक्षमा तयार गरिँदैछ ।

यस कामका लागि चाँडै नै अन्तरीक्षमा लाखौं माइल टाढा अन्तरीक्षयात्रीको टीम पठाउने तयारी नासाले गरेको छ । नासाले यो परियोजना सन् २०३० सम्म पुरा गर्ने भएको छ। यो टेलिस्कोपले ग्रहको वायुमण्डल र ३० प्रकाश वर्ष टाढासम्म सौर्य प्रणालीको पनि विश्लेषण गर्न सक्नेछ ।