तरकारी बजार अनुगमन गर्ने मन्त्रीलाई लौका र मुलाले आक्रमण
काठमाडौँ: बल्खु तरकारी बजार अनुगमन गर्न पुगेका आपूर्तिमन्त्री गणेशमान पुनमाथि तरकारी व्यापारीले लौका र मुलाले आक्रमण गरेका छन् ।
मंगलबार व्यापारीले प्रयोग गर्ने ढक तराजूको अनुगमन गर्न सरकारी टोलीसहित बल्खुस्थित तरकारी बजार पुगेका मन्त्री पुनमाथि तरकारी व्यापारीले लौका, मुला र इटाले आक्रमण गरेका हुन् ।
व्यापारीले अकस्मात तरकारी बजारमा आएर अनावश्यक दुःख दिएको भन्दै आक्रमण गरेका हुन् । आपूर्ति व्यवस्था विभाग, नापतौल तथा गुणस्तर विभाग, सुरक्षा निकाय र पत्रकार सहभागी टोलीमाथि व्यापारीले आक्रमण गरेका हुन्।
बल्खु तरकारी बजारमा प्रयोग हुने ढक तराजू मापदण्ड विपरितका भएको भन्दै गुनासो आएपछि मन्त्रीसहितको टोली अनुगमनका लागि मंगलबार तरकारी बजारमा पुगेको हो ।
सरकारी टोलीले कालीमाटी तरकारी बजारका ढक तराजूको सहज अध्ययन र अनुगमन गरेको भए पनि बल्खुमा आक्रमण सहनु परेको हो । व्यापारीले आक्रमण गरेपछि टोलीले अनुगमन स्थगित गरेर व्यापारीसँग बहस सुरु गरेको छ ।
बहसका क्रममा व्यापारीले ढक र तराजू नापतौल विभागले प्रमाणित गर्नुपर्ने भन्ने थाहा नभएको बताएका छन् । बजारमा अत्याधिक विषादी प्रयोग भएको तरकारी विक्री हुने गरेको भन्ने गुनासो समेत परेको छ ।
प्रतिक्रिया दिनुहोस !
