माधव नेपाल भन्छन्: अब राष्ट्रिय सरकार आवश्यक छ
काठमाडौं: पूर्वप्रधानमन्त्री एवं एमालेका वरिष्ठ नेता माधवकुमार नेपालले मुलुकमा अब राष्ट्रिय सरकार आवश्यक भएको बताएका छन् ।
भियतनाममा आयोजना भएको अन्तर्राष्ट्रिय कम्युनिस्ट पार्टीको बैठकमा भाग लिएर बुधबार स्वदेश फर्किएका नेपालले त्रिभुवन विमानस्थलमा सञ्चारकर्मीसँग उक्त कुरा बताएका हुन् । नेपालले त्यो आवश्यकता ख्याल गरेर नै सत्ता साझेदार दल एमाले र एमाओवादीले निर्णयसमेत गरिसकेको बताए ।
नेपालले अहिलेको बहुमतीय सरकार हटाएर अर्को बहुमतीय सरकारको खेलमा भने लाग्न नहुनेमा जोड दिए । उनले राष्ट्रिय सरकार गठन गर्दा को प्रधानमन्त्री बन्छ भन्ने बिन्दुबाट सुरु गर्न नहुने बताए । ‘पहिला राष्ट्रिय सरकार बनाउने विषयमा सहमत हौं, त्यसपछि सरकारको नेतृत्वका विषयमा छलफल गरौंला ।'
उनले अब राष्ट्रिय सहमतिको सरकार बनाउन छलफल अगाडि बढाइने बताए । नेता नेपालले बहुमतीय खेलबाट अहिले मुलुक अगाडि बढ्न नसक्ने दाबी पनि गरे । राष्ट्रिय सहमतिमा सबैलाई ल्याउन मुख्य ठूला पार्टी एमाले, कांग्रेस, माओवादी केन्द्रलगायत सबैले पहल गर्नुपर्नेमा जोड दिए ।
तपार्इं प्रधानमन्त्री केपी शर्मा ओलीको सरकार ढाल्न लाग्नुभएको हो भन्ने जिज्ञासमा नेपालले त्यसलाई काल्पनिक र हावादारीको संज्ञा दिए । ‘म देशभरि हिँडेको छु, पत्रकार सम्मेलनमा बोलेको छु । सरकार ढाल्ने कुरा गरेको छैन । ती सबै काल्पनिक र हावादारी कुरा हुन्', नेपालले भने ।
प्रतिक्रिया दिनुहोस !
