बंगलादेशमा फेरि आक्रमण, चारजना मारिए
काठमाडौं: बंगलादेशमा ईदगाह नजिकै आतंकवादी आक्रमण भएको छ । यो आक्रमणमा दुईजना प्रहरी, एकजना महिला र एकजना आक्रमणकारी मारिएका छन् ।
राजधानी ढाकाको छिमेकी जिल्ला किशोरगन्ज ईदको सबैभन्दा ठूलो कार्यक्रम भइरहेका बेला विस्फोट भएको हो ।
यो आक्रमणका क्रममा दुई पुलिस, एक महिला र एक आक्रमणकारीसहित चारजना मारिएका छन् भने ११ जना गम्भीर घाइते भएका छन् ।
साताअघि शुक्रवार ढाकामा २० जनाको ज्यान जाने गरी भएको आतंकवादी हमलापछि यो दोस्रो ठूलो हमला हो । आक्रमणपछि प्रहरीले यस इलाकालाई घेराउ गरेको छ । त्यहाँ सयौंको संख्यामा प्रहरी तैनाथ गरिएको छ ।
डेली स्टारका अनुसार ३० हजारजना मुस्लिमहरु प्राथनारत सालकिया ईदगाहमा आक्रमण भएको हो । बंगलादेशी प्रहरीले यो हमलामा स्थानीय आतंकवादी समूहको संलग्नता रहेको दाबी गरेको छ।
विस्फोट भएको समयमा ३० हजार बढी संख्यामा भेला भएका मुस्लिमहरु नमाज पढ्ने क्रममा थिए । विस्फोटपछि त्यहाँ भागदौड मच्चिएको थियो । यसअघि बंगलादेशमा आतंकवादी संगठन आइएसले आक्रमण गर्ने चेतावनी दिँदै आएको थियो ।
प्रतिक्रिया दिनुहोस !
