चरा ठोक्किएर एयरबस ग्राउन्डेड
काठमाडौं: राष्ट्रिय ध्वजाबाहक नेपाल वायुसेवा निगमको एयरबस ९ एनएकेएक्स (लुम्बिनी)मा बिहीबार बिहान चरा ठोक्किएर थन्किएको (ग्राउन्डेड भएको) छ । निगमको एक सय ५६ सिट क्षमताका दुईवटा एयरबस मध्येको एउटा जहाज थन्किएपछि निगमको उडानमा आंशिक प्रभाव पर्ने भएको छ ।
निगमको अन्तर्राष्ट्रिय उडानको यो जहाज ५६ जना यात्रु बोकेर हङकङ उडान गर्न लाग्दा त्रिभुवन विमानस्थलको धावनमार्गमा बिहान १० बजेर पाँच मिनेटमा चरासँग ठोक्किएको थियो । धावनमार्ग नछोड्दै चरासँग ठोक्किदा जहाजको दायाँ इन्जिनमा क्षति पुगेको निगमका प्रवक्ता रामहरि शर्माले जानकारी दिए । उनका अनुसार जहाज आवश्यक मर्मत गरेर उड्न करिब एक साताको समय लाग्ने अनुमान गरिएको छ । जहाजको इन्जिनमा पुगेको क्षतिको मूल्यांकन गर्ने र आवश्यक मर्मत गरेर उडान नगरेसम्म निगमको उडानमा आंशिक प्रभाव पर्ने भनाइ शर्माको छ ।
जहाजमा चरा ठोक्किएपछि दिल्लीबाट फर्किएको निगमकै अर्को सगरमाथा नामको एयरवसले सोही यात्रु लिएर हङ्कङ उडान गरेको पनि निगमले जानकारी दिएको छ । आठ जना चालकदलका सदस्यसहितको यो जहाज उड्नै नपाइ चरासँग ठोकिएकोले कुनै ठूलो नोक्सान नभएको र मानवीय त्रुटि नभएको पनि निगमकै भनाइ छ ।
निगमको अन्तर्राष्ट्रिय उडानको यो जहाज ५६ जना यात्रु बोकेर हङकङ उडान गर्न लाग्दा त्रिभुवन विमानस्थलको धावनमार्गमा बिहान १० बजेर पाँच मिनेटमा चरासँग ठोक्किएको थियो ।
निगम स्रोतले दिएको जानकारी अनुसार जहाजको दायाँतर्फको इन्जिनको दुईवटा फ्लाइङ प्लेटमा क्षति पुगेको छ । यस्तो प्लेट निगमकै अर्को अन्तर्राष्ट्रिय उडानको जहाज बोइङको एउटाकै करिब ४० लाख रुपैयाँ पर्छ । सोही अनुपातको मूल्यको लागतले पनि दुईवटा प्लेट परिवर्तन गर्न र आवश्यक मर्मतका लागि करिब एक करोड रुपैयाँ खर्च हुने अनुमान निगमको छ ।
निगमको एयरवसले मात्रै सातामा २२ वटा उडान गर्दै आएको छ । दुईवटा एयरवले भारतको दिल्लीमा मात्रै सातामा ११ वटा उडान गर्ने गरेको छ । एउटा जहाज थन्किएपछि उडान चाप पर्ने र अरु जहाजलाई पूर्ण क्षमतामा उपयोग गर्दा पनि कम्तीमा ३० प्रतिशतसम्म उडान प्रभावित हुनसक्ने निगमको भनाइ छ ।
एयरबसको यो जहाज छिटो गरेर उडान गर्ने तयारीमा निगम जुटिसकेको पनि जानकारी दिएको छ । निगमको अन्तर्राष्ट्रिय उडानमा अर्को दुईवटा एक सय ९० सिट क्षमताको बोइङ जहाज भए पनि एउटा बिग्रिएर बसेको छ भने एउटाले मात्रै उडान गरिररहेको छ । एउटा एयरबस थन्किएपछि निगमसँग अहिले बोइङ र एयरबसका एकएक जहाज मात्रै उडानमा रहने भएका छन् ।
विमानस्थल वरिपरि भएको फोहोरले चरा बढेको भन्दै विमानस्थले चरा नियन्त्रण गर्ने विभिन्न विधि अपनाउने बताउँदै आए पनि प्रभाविकारी भने हुन सकेको छैन । विमानस्थलका महाप्रबन्धक देवानन्द उपाध्यायका अनुसार विमानस्थको तीन किलोमिटर वरपर कुनै फोहोर र बधशाला हुनु हुँदैन । तर, वरिपरि वस्ती र मानवीय कमजोरीले चरा बढेको उनको बुझाइ छ ।
चरा थपाउन शिकारी राख्ने, साइनिङ राख्नेलगायतका विधि प्रयोग गरिरहेको भए पनि त्यो पर्याप्त पुगेको छैन । विमानस्थल कार्यालयले चराको मुभमेन्ट थाहा पाउन एभिएन राडान राख्ने तयारी गरिरहेको छ । बर्ड डिडेक्सन नामको यो राडार राखेपछि रनवे वा वरपर भएको चराको बारेमा जानकारी दिन सकिने र सुरक्षित उपाय अपनाउन सकिने बुझाइ उपाध्यायको छ । यो राडार आगामी आबमा जडान गरिसक्ने योजना छ ।
प्रतिक्रिया दिनुहोस !
