तातोपानी क्षेत्र सञ्चार सम्पर्कबाहिर
चौतारा: भोटेकोसी नदीमा आएको बाढीले एनसेलको टावर रहेको घर कटान गरेर नदीमा मिसाएपछि तातोपानी क्षेत्र सञ्चार सम्पर्कविहीन बनेको छ । यसअघि राजमार्गका विभिन्न भागमा सडक कटान गरेकाले सडक सञ्जालबाट सीमा क्षेत्रको सम्पर्क विच्छेद भइसकेको थियो ।
शनिबार लिपिङस्थित एनसेलको टावर रहेकोसहित १५ घर नदीको कटानमा परेका छन । स्थानीय प्रशासनको अभिलेखमा यी १५ सहित कुल ४२ घर पूर्ण रूपमा क्षति भएको उल्लेख छ । सम्पर्कमा आएका स्थानीयले ६० भन्दा बढी घर पूर्ण रूपमा क्षति भएको बताएका छन् । शनिबार १५ घर नदीको कटानमा परेको जानकारी दिए पनि जिल्ला प्रहरी प्रमुख प्रहरी उपरीक्षक रवीन्द्र केसीले तातोपानी क्षेत्रमा मात्र भने ।
तातोपानी क्षेत्रको कुन ठाउँको कति घर नदीमा मिसिए भन्नेमा जिल्ला प्रहरी प्रमुखसमेत अनभिज्ञ छन् । तातोपानी क्षेत्रका लिपिङ, तातोपानी, कोदारी, १० किलोलगायत बस्ती कटानको उच्च जोखिममा छन् । प्रहरी प्रमुख केसीलाई तातोपानी क्षेत्रका कुनकुन ठाउँको घर नदी कटानमा परेको भन्ने जानकारी छैन । एनसेलको टावर घरसँगै नदीमा मिसिएपछि सीमा प्रहरी कार्यालय प्रमुख प्रहरी निरीक्षक खुमलाल भुसाल सञ्चार सम्पर्कबाट बाहिर छन् ।
नदीमा बाढी नबढे पनि नदीको धार राजमार्गतर्फ भएकाले अझै कति क्षति हुन्छ भन्ने अनुमान गर्न कठिन छ । तत्काल नदी नियन्त्रणमा ल्याएर बस्ती जोगाउने योजना आउन सकेको छैन । प्राविधिकले नदीको बहाव कम नभएसम्म कटान रोक्न सम्भव नहुने बताएका छन् ।
मंगलबार राति एक्कासि चीनतर्फबाट आएको बाढीले सीमा क्षेत्रका घर बगाउन सुरु गरेको थियो । बाढीको उच्च बहावकै बेला लिपिङ र तातोपानीमा २१ घर बगाएको भोटेकोसीले त्यसयताको पाँच दिनमा थप ४० भन्दा बढी घर बस्न नहुने गरी क्षति पुर्याएको छ । लगातार बजारतर्फ कटान भइरहँदा सीमाको लिपिङ र तातोपानीमा पुनः बसोबास गर्नै सम्भव नहुने संकेत देखिएको राजधानीमा रहेका तातोपानीका दावा शेर्पाले टेलिफोनमा बताए । भूकम्पपछि धेरै स्थानीयले बसोबास छाडिसकेको तातोपानी क्षेत्र बाढीपछि पूर्ण रूपमा मानवविहीन बन्ने अवस्थामा पुगेको छ ।
प्रतिक्रिया दिनुहोस !
