तमोर नदीको खतरा तत्कालका लागि टर्यो
ताप्लेजुङः पहिरोले थुनेको तमोरको पानी आफैँ बाटो बनाएर बगेपछि नदी किनारका बासिन्दाले केही राहतको महसुस गर्न थालेका छन् ।
आइतबार बिहानको राती दुई बजे ताप्लेजुङको सावादिन १ मा पर्ने मित्लुङ भन्ने भिरबाट पहिरो खसेपछि थुनिएको तमोर नदी विस्तारै सतहमा आएकाले तत्कालको खतरा टरेको प्रहरीले जनाएको छ ।
एकैपटक बाँध खुल्ने आशंकामा नदीको दक्षिणी क्षेत्रको नदी किनारका बासिन्दा निकै त्रसिद बनेका थिए । तर, नदीको सतह विस्तारै घटेपछि त्रासमा बसेका तमोर नदी किनारका बासिन्दाले तत्कालको खतरा टरेको महसुस गरेका छन् ।
तमोर नदी थुनिदा तल्लो तटीय क्षेत्रका तीन वटा बजार जोखिममा परेका थिए । नदी थुनिएको स्थान भन्दा दक्षिण तर्फका मित्लुङ, दोभान र हान्द्रुङ बजारका स्थानीयबासी बाढी आउने खतराल त्रसित थिए ।
जिल्ला प्रहरी कार्यालयका निमित्त प्रहरी प्रमुख इन्सपेक्टर शैलेन्द्रकुमार यादवले हान्द्रुङ र दोभानका बासिन्दालाई अझै पनि सतर्क रहन खबर गरिएको जानकारी दिए ।
उनले पहिरो गएर नदी थुनिएको ठाउँमा नेपाल प्रहरी र नयाँ रणभीम गुल्मबाट नेपाली सेनाको टोली समेत पुगिसकेको बताउदै पहिरोको थप खतरा बारे प्रहरी र नेपाली सेनाको टोलीले उक्त क्षेत्रको अध्ययन गरिरहेको जानकारी दिए ।
नदी सामान्य अवस्थामा बग्न सुरु गरेपनि पहिरोको लेदो सहित नदी बगेकाले त्रास कायम रहेको स्थानीयबासी गंगा गुरागाईले बताए । दोभान बजारमा पसल गर्दै आएका उनले पहिरोले निम्त्याउन सक्ने खतरा बारे सतर्क रहदैँ आफुहरुले पहिरो गएर नदी थुनिएको क्षेत्रका बासिन्दा सँग निरन्तर सम्पर्क गरिरहेको बताए ।
रातको ३ बजे सावादिनमा पहिरो गएर नदी थुनियो भन्ने खबर आए पछि राती नै आफुहरु बजार छोडेर डाँडामा बसेको गुरागाईले बताए ।
सावादिनका वासिन्दाले दोभान र हान्दु्रङ बजारका बासिन्दालाई राती नै नदी थुनिएको जानकारी गराउदै सतर्क रहन आग्रह आग्रह गरेका थिए ।
गत वर्ष ५९ जनाको ज्यान लिने गरी दोभान नजिकैका खोक्लिङ, लिवाङ, लिङतेप, थिङलावु, सान्थाक्रा गाविसमा पहिरो जाँदा पनि यसरी नै मेवा नदी थुनिएर दोभान र हान्द्रुङका वासिन्दा त्रासमा परेका थिए ।
दिउँसो बजार पसल गर्न दोभान गए पनि महिना दिनसम्म यहाँका वासिन्दा सुत्नको लागि बजार भन्दा माथीको नागेश्वरी, देउलिङगे र लहरेगाँउसम्म जाने गरेका थिए । तमोर नदी किनारमा रहेको हान्द्रुङमा २५ र दोभानमा ६० घर छन् ।