करेन्ट लागेर दिदिबहिनीको मृत्यु, चारजना घाइते
धनगढीः विद्यालय जान लागेका बेला विजुलीको तार चुँडिएर करेन्ट लागेपछि सोमबार विहान डोटीमा दुईजना बालिकाको ज्यान गएको छ । यो घटनामा चारजना बालिका घाइते भएका छन ।
दिपायल–सिलगढी नगरपालिका–१४ का गणेश औजीका दुई छोरी १० वर्षकी रोजा औजी र ८ वर्षकी रेश्मा औजीको करेन्ट लागेर घटनास्थलमै ज्यान गएको जिल्ला प्रहरी कार्यालय दिपायलका प्रमुख प्रहरी उपरीक्षक डिल्लीराज विष्टले जानकारी दिए ।
सोमबार विहान सवा ६ बजेतिर पानी परिरहेका बेला दुबैजना दिदिबहिनी एउटै छाता ओढेर नजिकै रहेको दुर्गा निमावितर्फ गइरहेका बेला माथिबाट विद्युतको तार चुँडिएर खसेपछि दुबैलाई करेन्ट लागेको प्रहरीले जनाएको छ ।
रोजाको दाहिने हातको कुहिनोभन्दा तलको भाग करेन्टले अलग भएको छ । रोजा दुर्गा निमाविमा कक्षा २ र रेश्मा कक्षा मा अध्ययनत थिए ।
दुईवटा पोलको बीचबाट तार चुँडिएर समुह बनाएर विद्यालय गइरहेका बालिकाहरुमाथि खसेपछि अन्य चारजना घाइते भएका प्रहरीले जनाएको छ ।
घाइतेहरुमा पनि सोही ठाउँका १० वर्षकी कालु औजी, ८ वर्षकी ईश्वर औजी, १० वर्षकी सन्तु औजी र ७ वर्षकी सीता औजीलाई उपचारका लागि जिल्ला अस्पताल डोटीमा भर्ना गरिएको छ ।
घाइते चारैजना बालिका भने बोल्न थालेका छन् । उनीहरु खतरामुक्त रहेको डोटीका प्रहरी उपरीक्षक डिल्लीराज विष्टले बताए । मृतकका आफन्तहरुले विद्युतको तार जोड्दा लापरवाही गरेकाले क्षतिपुर्ति नपाउँदासम्म शव नउठाउने भन्दै घटनास्थलमा विद्युत प्राधिकरणका प्रमुख आउनुपर्ने माग गरेका छन ।
सोमबार दिउँसोसम्म पनि पीडित परिवारले शव उठाउन नमानेको पनि प्रहरीले जनाएको छ ।