अझै रोकिएन भोटेकोशी बाढीको कटान
चौताराः भोटेकोशीमा बाढी आएको एक साता बित्न लाग्दा पनि नदिको बहावले घर कटान गर्ने क्रम रोकिएको छैन।
आइतबार राती र सोमबार बिहान मात्र तातोपानीको कोदारीका छ घर नदिको बहावले कटान गरेको छ । प्रहरीका अनुसार कोदारीका लाक्पाठिलेन शेर्पा, बीरबहादुर तामाङ, बिन्दा तामाङ, कोमलबाबु श्रेष्ठ र सन्तमान तामाङको घर पछिल्लो पटक भोटेकोशीको कटानमा गरेको छ ।
पानीको वहाव सामान्य रहेपनि पानीको धार बस्तीतर्फ बढेको र नदीले जमिनको माटो बगाउँदै लगेपछि घर ढल्ने गरेको प्रहरीको भनाइ छ । भोटेकोशी बाढीले लार्चादेखि लिपिङसम्म राजमार्गका सबै बस्ती पूर्णरुपमा खतरामा रहेका छन् । मंगलबारदेखि लगातार जमिन कटान हुने क्रम नरोकिँदा राजमार्गमा थप क्षति पुगेको छ ।
कटानलाई आधार मान्दा लार्चादेखि सिमासम्मका सबै बस्ती जोखिममा रहेको जिल्ला प्रहरी प्रमुख एुुसपी रविन्द्र केसीले बताए । केसीका अनुसार राजमार्ग तर्फका अधिकांश बस्तीलाई नदिले कटान गर्न सक्ने खतरा छ ।
धार्मिक एवम् पर्यटकीय सम्पदा तातोपानी धाराको अधिकांश भाग कटानमा परिसकेको छ । बाह्रबिसेदेखि तातोपानी सम्मका बस्ती यातायात, सञ्चार, विद्युत लगायतका पूर्वाधारबाट बञ्चित छन् ।
राजमार्ग सुचारु गराउन नसक्ने हो भने केही दिनमै खाद्यान्नको संकट हुन सक्ने स्थानीय कामी शेर्पाले बताए । बाढीको कटानमा नपर्ने गाउँमा पनि यातायात सुचारु हुन नसके खाद्यान्न संकट हुने उनले औंल्याए ।
स्थानीय उत्पादन नहुने र बजारकै भर पर्नुपर्ने गाती, मार्मिङ, फुल्पिङकट्टी, लिस्ती, तातोपानी लगायत गाउँका हिमाली बस्ती राजमार्ग नहुँदा खाने कुराको अभाव झेल्नुपर्ने खतरा हुने जिल्ला दैवी प्रकोप उद्वार समितिले पनि जनाएको छ ।
कटान नरोकिएको र वैकल्पिक मार्ग सञ्चालन गर्न पनि भौगोलिक अवस्थाले कठिनाई हुँदा तत्काल राजमार्ग सञ्चालन गर्न समस्या रहेको जिल्लास्थित अधिकारीको भनाइ छ ।
मगलबार राती चिनतिरबाट आएको बाढीले २१ घर बगाएर सुरु भएको बस्ती बगाउने क्रम सोमबारसम्म ६० भन्दा बढी घर बगाउँदा पनि रोकिएको छैन ।
जमिन कटान गर्दै गएकाले अझै तीन सय भन्दा बढी घर कटानमा पर्न सक्ने प्रहरीको अनुमान छ ।