साहित्य लेख्नका लागि लेखनवृत्ति
काठमाडौं: फरक क्षमताका कवि वियोग सापकोटाले छोरी एलिनालाई भनेछन् ‘मलाई लेख्न मन लागेको बेला लेख्न पाइनँ भने घाइते बाघजस्तै हुन्छु, मलाई लेख्न देओ ।' कवि सापकोटा राम्रोसँग बोल्दैनन् । मज्जाले हिँड्न सक्दैनन् । तर उनको साहित्य क्षमता बेजोडको छ । साहित्य फुरिरहे पनि चाहेको बेला लेख्न पाउँदैन । कारण उनको कलम चल्दैन । छोरीले उनले बोलेको सजिलै बुझ्छिन् ।
साहित्य लेखनका लागि उनलाई समय दिने कसले ? सबैको आ–आफ्नै व्यस्तता हुन्छ । वियोग सापकोटा रेडियो सुन्छन् । पत्रपत्रिका सुनाउन भन्छन् । केही फुर्यो भने लेख्न रहर गर्छन् । साहित्यकार वियोग सापकोटालाई इटहरीस्थित उनकै घरमा गएर घोस्ट राइटिङ्ग नेपालले लेखनवृत्ति उपलब्ध गराको छ । मनमा लागेको बेला लेख्न पाइयोस् भनेर उनका लागि छुट्ट्याइएको लेखन वृत्ति उनकी छोरीले पाउनेछिन् ।
वियोग सापकोटा निवासमा भएको कार्यक्रममा घोस्ट राइटिङ्ग नेपालका अध्यक्ष कमल ढकालले कवि वियोग सापकोटाको सिर्जनशीलता मर्न नदिन लेखेका सबै पुस्तक प्रकाशन गर्ने र त्यसबापत रोयल्टीसमेत उपलब्ध गराउने बताए । ढकालले किताब लेख्नका लागि नै लेखनवृत्ति उपलब्ध गराउँदै उनले कार्यक्रमका सभापति लेखनाथ घिमिरेलाई २५ हजारको चेक हस्तान्तरण गरे ।
कार्यक्रमका प्रमुख अतिथि प्राडा टंक न्यौपानेले साहित्यिक प्रोत्साहनले सबै लेखकलाई खुसी तुल्याएको बताए । ‘लेख्न पनि प्रेरित गर्ने, अनि लेखेको छापेर रोयल्टी पनि दिने, लेखकका लागि योभन्दा खुसीको सन्देश के होला ? ' न्यौपानेले भने । कवि अनिल पौडेलले सापकोटाको शारीरिक दुर्वलता भए पनि साहित्यिक क्षमता बेजोड भएको बताए ।
वियोग सापकोटा आफैं लेख्न र हिँडडुल गर्न सक्दैनन् । छोरी एलिना सापकोटाले मात्रै उनको बोली बुझ्छिन् र भनेको लेखिदिन्छिन् । ‘फुरेको बेला लेख्न पाउनु भएन भने बुवा भोको बाघझैं गर्नुहुन्छ', एलिनाले भनिन् । त्यही भोक कम गर्न लेखनवृत्ति उपलब्ध गराएको घोस्ट राइटिङ्गले जनाएको छ ।
प्रतिक्रिया दिनुहोस !
