मन्त्री छान्दै दाहाल

काठमाडौं: माओवादी केन्द्रका अध्यक्ष पुष्पकमल दाहाललाई राष्ट्र र जनतामा केन्द्रीत मुद्दाको सम्मान गर्नसक्ने बढीमा २५ सदस्यीय मन्त्रिपरिषद् गठन गर्न पार्टीभित्रकै नेताहरूले सुझाव दिएका छन् ।

दाहालले आफ्नो नेतृत्वमा गठन हुने भावी सरकारको संरचना र त्यसमा पार्टीको प्रतिनिधित्वका लागि विशेष गृहकार्यको जिम्मेवारी महासचिव कृष्णबहादुर महरालाई दिएका छन् । यसअनुसार महराले पार्टी नेतृत्वसँग अनौपचारिक परामर्श थालेको जानकारी स्रोतले दियो । महराले गृहकार्यको आधार संविधानको कार्यान्वयन, शान्ति सम्झौताअन्तर्गत द्वन्द्वकालीन मुद्दाको निरुपण, सक्षम र प्रभावकारी संक्रमणकालीन न्याय र जनमुखि दृष्टिकोण राखेका छन् ।

दाहालले पहिलोपटक प्रधानमन्त्री हुँदाको नौ महिने कार्यकालको समीक्षा समेत गरिरहेको स्रोतले बतायो । पहिलोपटक उनी २०६५ भदौ २ गतेदेखि २०६६ जेठ ११ गतेसम्म प्रधानमन्त्री भएका थिए ।

पूर्वलडाकुका डेपुटी कमाण्डर चक्रपाणी खनाल (वलदेव) ले दाहाल नेतृत्वको भावी मन्त्रिपरिषद् समानुपातिक र समावेशी हुनुपर्ने बताए । उनले भने, ‘सत्ताको मुख्य हिस्सेदार कांग्रेसको सहभागिता, पार्टीभित्र सरकारमा सहभागिताका लागि जारी चर्को विवादको निरुपण, संविधानको कार्यान्वयन, शान्ति प्रक्रियाको पूर्णता, जनतासँग प्रत्यक्ष सरोकारका माग र कार्यलाई निकास दिनसक्ने टिमको चयन हुनुपर्छ ।'

गुट र उपगुट बनाउँदै नेताको स्वार्थमा मन्त्रिपरिष्द गठन गर्दा दाहाललाई नै अप्ठ्यारो पर्ने उनले बताए । उनले भने, ‘राष्ट्र र जनतामा केन्द्रीत मुद्दालाई सम्मान गर्ने मन्त्रिपरिषद् दिँदै सोही अनुसारको काम अगाडि बढाउने नीतिको कार्यान्वयन दाहालबाट हुनेछ ।'

माओवादी केन्द्रका सभासद् एवं वरिष्ठ अधिवक्ता रामनारायण विडारीले मन्त्रिपरिष्दको अहिलेसम्मको उद्देश्य नै राष्ट्र र जनताका नाममा पार्टी र आफन्तको भरणपोषण देखिएकाले दाहालबाट त्यस्तो कार्यको अन्त्य हुनुपर्ने बताए । पहिलेको अनुभवलाई दाहालले दोस्रो पटकको अवसरमा कार्यान्वयन गर्ने विश्वासमा आफू रहेको पनि उनले बताए ।

 

माओवादी केन्द्रका तर्फबाट उपप्रधानमन्त्री एवं अर्थमन्त्रीमा कृष्णबहादुर महरा, स्थानीय विकास मन्त्रीमा जनार्दन शर्माको नाम आएको छ । त्यस्तै नेता गिरिराजमणी पोखरेल र हितराज पाण्डे पनि मन्त्रीको सूचीको अग्र भागमा रहेको स्रोतले बतायो ।

यसैगरी कर्णालीबाट महेन्द्रबहादुर शाही, मधेसबाट प्रभु शाह, महिलाबाट रेखा शर्मा नभए सीता नेपाली, थारुबाट गौरीशंकर थारु वा वुद्धिसागर चौधरी, दलितबाट दलजित श्रीपालीको नाम मन्त्री हुने सूचीमा छ । पोखरेल र शर्मालाई वर्तमान सरकारमा रहँदा प्रभावकारी काम गरेको भन्ने मूल्यांकन दाहाल र माओवादी नेतृत्वले गरेको छ ।

माओवादी केन्द्रका प्रमुख सचेतक हितराज पाण्डेले नयाँ सरकार निर्माणका विषयमा आवश्यक नीति र कार्यक्रम अझै तय नभएको, मन्त्रालयहरु विभाजनमा स्पष्ट नीति नबनिसकेकाले अहिले नै आफूले सबै विषयमा बताउन नसक्ने जानकारी दिए ।