बेलायती प्रधानमन्त्रीलाई ओलीको बधाई
काठमाडौं: प्रधानमन्त्री केपी शर्मा ओलीले बेलायतकी नवनियुक्त प्रधानमन्त्री थेरेसा मेलाई बधाई दिएका छन् । नेपाल र बेलायतबीचको परम्परागत न्यानो, निकट, मित्रवत् र सहकार्यात्मक कूटनीतिक सम्बन्धले दुई सय वर्ष पार गरेको बताउँदै ओलीले बधाई सन्देशमा नेपालको लोकतान्त्रिक संघर्षमा बेलायतले पुर्याउँदै आएको सहयोगको प्रशंसा गरेका छन् ।
नेपालको अहिलेको प्रमुख प्राथमिकता संविधान कार्यान्वयन र भूकम्पपछिको पुनर्निर्माण प्रक्रियालाई गति दिनु रहेको सन्देशमा ओलीले उल्लेख गरेका छन् । दिगो आर्थिक विकास हासिल गर्नेतर्फ नेपालले आधार खडा गरेको बताउँदै ओलीले बेलायतबाट नेपालप्रतिको ऐक्यबद्धता र सहकार्य कायम रहने अपेक्षा व्यक्त गरेका छन् ।
बेलायतकी नयाँ प्रधानमन्त्रीमा बुधबार कन्जरभेटिभ पार्टीकी नेतृ थेरेसा मे नियुक्ति भएकी छन् । प्रधानमन्त्रीका लागि प्रतिस्पर्धामा रहेकी कन्जरभेटिभ पार्टीकी अर्की नेतृ आन्द्रेई लिडसमले सोमबार उम्मेदवारी फिर्ता लिएपछि थेरेसा प्रधानमन्त्री बन्ने पक्का भएको थियो । नयाँ प्रधानमन्त्री थेरेसाले बुधबार पदभार ग्रहण गरेकी छन् । मार्गरेट थ्याचरपछि थेरेसा बेलायतकी दोस्रो महिला प्रधानमन्त्री बनेकी हुन् ।
५९ वर्षीया थेरेसा पूर्ववर्ती क्यामरुन सरकारकी गृहमन्त्री हुन् । गत जुन २३ मा भएको जनमतसंग्रहमा ५२ प्रतिशत बेलायतीले बेलायत ईयूबाट बाहिरिने पक्षमा मत दिएका थिए । थेरेसा बेलायत ईयूबाट बाहिरिन नहुने पक्षमा थिइन् । यद्यपि थेरेसाले प्रधानमन्त्री नियुक्त भएलगत्तै आफूले ईयूबाट बेलायतलाई सहज बहिर्गमन गराउन भूमिका खेल्ने प्रतिक्रिया दिएकी छन् ।
जनमत संग्रहको परिणामलगत्तै प्रधानमन्त्री क्यामरुनले पदबाट राजीनामाको घोषणा गरेका थिए । प्रधानमन्त्रीका लागि बेलायती कन्जरभेटिभ पार्टीका दुई नेतृ थेरेसा र आन्द्रेईले उम्मेदवारी घोषणा गरेका थिए । सेप्टेम्बर ९ भित्र कन्जरभेटिभ पार्टीभित्र मतदान हुने र नयाँ नेतृत्व चुन्ने भनिए पनि प्रतिस्पर्धामा रहेकी पार्टीकी नेतृ आन्दे्रईले उम्मेदवारी फिर्ता लिएपछि थेरेसा प्रधानमन्त्री बनेकी हुन् ।
प्रतिक्रिया दिनुहोस !
