बिहे घरमा मध्ये राति गोली चलेपछि...
काठमाडौं: अंग्रेजी र लोकदोहारीमध्ये कुन गीत बजाउने भन्ने विवादमा ललितपुरको देवीचौरमा बिहीबार राति गोली चलेको छ । वैवाहिक कार्यक्रममा एउटै गाउँ वरपरका आफन्त भए पनि गीत बजाउने निहुँमा भरुवा बन्दुक पड्कँदा स्थानीय प्रवेश तामाङ घाइते भएका छन् ।
देवीचौरका मनिक थिङले प्रवेशलाई भरुवा बन्दुक प्रहार गरेका थिए । गोलीको छर्रा प्रवेशको तिघ्राभित्र छिरेको छ । दोहोरो भिडन्तमा सोनाम तामाङ र सूर्य तामाङसमेत घाइते भएका थिए । मनिकको समूहका राजकुमार थिङ, विशाल थिङ र अमित थिङलगायतले तरबारसमेत प्रहार गरेका थिए ।
घाइते तामाङ त्रयलाई उपचारका लागि पाटन अस्पताल लगिएको थियो । खुट्टामा भरुवा बन्दुकको छर्रा लागेर गम्भीर घाइते प्रवेश तामाङलाई थप उपचारका लागि त्रिवि शिक्षण अस्पताल महाराजगन्ज लगिएको जानकारी महानगरीय प्रहरी परिसर ललितपुरका प्रमुख एसएसपी पीताम्बर अधिकारीले दिए । सोनाम र सूर्य उपचारपछि घर फर्केका छन् ।
प्रहरी वृत्त चापागाउँ र प्रहरी चौकी टीकाभैरवबाट खटिएको प्रहरी टोलीले घटनामा प्रयोग भएको एक थान भरुवा बन्दुक, एक थान तरबारसहित २० जनालाई नियन्त्रणमा लिएको छ । परिसर प्रमुख एसएसपी अधिकारीका अनुसार विवाहमा अंग्रेजी र लोकदोहोरीमध्ये कुन गीत बजाउने भन्ने निहुँमा झगडा भएको थियो ।
‘प्रहरीले घटना साम्य बनाउने र संलग्न व्यक्तिलाई नियन्त्रण गर्न धेरै मेहनत गर्नुपर्यो, अनुसन्धानका लागि दुई पक्षलाई नियन्त्रणमा लिएका छौं', एसएसपी अधिकारीले भने । मनिक घटनाका मुख्य अभियुक्त हुन् । घरमा राखेको भरुवा बन्दुक ल्याएर एक राउन्ड गोली प्रहार गरेको जानकारी एसएसपी अधिकारीले दिए ।