‘एउटीमात्र महिलासँग बस्न मुस्किल छ'
लन्डन: अन्य क्यारिबियन खेलाडीजस्तै छोटो दूरीका कीर्तिमानी धावक उसेन बोल्ट पनि जीवनको साधारणमन्त्र ‘प्ले हार्ड, पार्टी हार्डर' मै विश्वास गर्छन् । ६ पटकका ओलम्पिक च्याम्पियन उनी अर्को महिनाबाट ब्राजिलमा सुरु हुने आसन्न रियो ओलम्पिकका अन्तिम तयारीमा जुटिरहेका छन् ।
सायद रियो ओलम्पिक उनको खेल जीवनको अन्तिम ओलम्पिक सहभागिता पनि हुन सक्नेछ । त्यसैले रियोमा पनि उनले अघिल्लो सहभागिताकै नतिजालाई दोहोर्याउने योजना बनाएका छन् ।
ट्रयाक एन्ड फिल्डका राजा मानिने बोल्टले हालै बेलायतको पत्रिका टेलिग्राफलाई दिएको एक अन्तर्वार्तामा मैदानबाहिरको आफ्ना केही रोचक प्रसंग पनि सार्वजनिक गरेका छन् । पछिल्लो दुई वर्षदेखि प्रेमसम्बन्धमा रहेका बोल्टले एकै महिलासँग समय बिताउन आफ्ना लागि मुस्किल रहेको बताएका छन् ।
उनले खेलकुदमा चर्चित भएपछि एकै महिलासँग मात्रै जिन्दगी बताउनु चनौतीपूर्ण हुने अनुभव सुनाएका छन् । ‘यदि तपाईं चर्चित हुनुहुन्छ भने, तपाईंलाई चाहने महिलाहरूको ठूलो दबाब हुनेछ', बोल्ट भन्छन्, ‘केटीहरू उनीहरूका सबै चीज तपाईंलाई समर्पण गर्न तयार हुन्छन् । सधैं तपाईंको नजिक हुन रुचाउछन् । यस्तो बेला केटाहरूलाई पनि मुस्किल हुने गर्छ । तपाईं नाइँ भन्न सक्नुहुन्न ।'
बोल्टले यस मामलामा बेलायत र जमैकाको संस्कृति उस्तै रहेको बताए । ‘इङ्ल्यान्डमा रोनीले चाँडै विवाह गरे । अन्य खेलाडी पनि चाँडै चर्चित हुन्छन् । जति बेला उनीहरू चर्चित बन्छन्, उनीहरूलाई पनि त्यस्तै दबाब हुने गर्छ', उनले भने, ‘जमैकामा पनि अवस्था त्यस्तै छ । त्यहाँ पनि चर्चित भएपछि यस्तै दबाब झेल्नुपर्छ ।'
सायद बोल्टले अर्को महिनाबाट यस्ता थप दबाब झेल्नु पर्नेछ । किनभने उत्कृष्ट फर्ममा रहेका बोल्टले रियो ओलम्पिकमा पनि उत्कृष्ट प्रदर्शन दिने पक्का छ ।
प्रतिक्रिया दिनुहोस !
