मापसेका कारण कहालीलाग्दो दुर्घटना (फोटोफिचर)
काठमाडौं: राजधानीको छाउनीमा शनिबार विहान कहालीलाग्दो सडक दुर्घटना भएको छ । बा ३ च ९२३४ नम्बरको कार चालक बानेश्वर थापागाउँका राजेन्द्र विष्टले अन्धाधुन्द गाडी हाँक्दा सडकमा गुडिरहेको बा ४४ प १२९५ स्कुटर तीन फिट उडेर सडक पेटीमा बजारिएको थियो । चालक विष्टले मादक पदार्थ सेवन गरेर कार हाँकेको प्रहरीले जनाएको छ ।
छाउनीस्थित नेपाल टेलिकमको पर्खालमा विहान साढे आठ बजे ढोकिएको स्कुटीमा सवार थिए सशस्त्र प्रहरीमा फलोअर्सको काम गर्ने कर्मा लामा र उनकी पत्नी सम्झना लामा । उनीहरु छाउनीतर्फ गईरहेका बेला सीतापाईलाबाट टाहाचालतर्फ आईरहेको विष्टले हाँकेको कारले ठक्कर दिएको हो । कारसमेत टेलिकमको पर्खालमा बजारिएको थियो ।
घाईते स्कुटीमा सवार लामाद्वयलाई तत्कालै उपचारको लागि त्यहाँ खटिएका सेना र स्थानीयले छाउनीस्थित वीरेन्द्र सैनिक अस्पताल पुर्याएका थिए । पछि सशस्त्र प्रहरीमा काम गर्ने खुलेपछि उनीहरुलाई बलम्बुस्थित सशस्त्र प्रहरी अस्पताल पुर्याईएको हो ।
दुर्घटनाग्रस्त स्कुटर
घाईते मध्ये कर्माको टाउको र दाहिने तिघ्रामा गम्भीर चोट लागेको छ। उनी बोल्न नसक्ने अवस्थामा रहेको महानगरीय प्रहरी वृत्त स्वयम्भूले जनाएको छ । सम्झनाको बाहिरी चोट नदेखिएपनि उनी गम्भीर छिन् ।
दुर्घटनालाई नजिकैबाट नियालेकी सरस्वती खनालले भनिन्,‘ हेर्दाहेर्दै स्कुटरलाई कारले ठक्कर दिएर उडाईदियो, स्कुटरमा सवार दुई जना उछिट्टिएर पेटीमा बजारिए, कार टेलिकमको पर्खालमा गएर जोतिएको थियो, झण्डै म आफैं बेहोस हुन पुगें ।' छाउनीस्थित सैनिक संग्राहलयमा काम गर्दै आएकी खनालले दुर्घटना ज्यादै भयानक र फिल्मी शैली जस्तो देखिएको बताईन् । उनले कार चालकको लापरबाहीले यो दुर्घटना भएको बताईन् ।
महानगरीय प्रहरी परिसर काठमाडौंका प्रवक्ता एसपी प्रद्युम्न कार्कीले दुर्घटनाका कार चालकले मादक पदार्थ सेवन गरेको जानकारी दिए । उनले भने,‘ चालकलाई पक्राउ गरेर अनुसन्धान भईरहेको छ, घाईतेको उपचार सशस्त्रकै अस्पतालमा भईरहेको छ ।
दुर्घटनास्थलका थप तस्बिर हेर्नुहोस्
प्रतिक्रिया दिनुहोस !
