मकवानपुरको निर्यात २४ प्रतिशत घट्यो

हेटौंडा: मकवानपुरबाट भारतसहित अन्य मुलुकसँगको निर्यात व्यापार गत आर्थिक वर्ष २४ प्रतिशतले घटेको छ । आर्थिक वर्ष २०७२/७३ मा मकवानपुरबाट देश बाहिर ३७ करोड पाँच लाख सात हजार रुपैयाँको सामान निर्यात भएको छ ।

मकवानपुर उद्योग वाणिज्य संघका अनुसार गत आर्थिक वर्ष २०७१/७२ मा ४८ करोड ७७ लाख ३० हजार रुपैयाँको सामन निर्यात भएको छ ।

संघले उत्पत्तिको प्रमाणपत्र जारी गरेको बाराका दुई, सिरहा र काठमाडौंका एक/एक उद्योगसहित मकवानपुरका छ उद्योगको निर्यात व्यापारमा भूकम्प र नाकाबन्दीका कारण गिरावट आएको संघका अध्यक्ष राजकुमार न्यौपानेले जानकारी दिए ।

हेटौंडा औद्योगिक क्षेत्रस्थित सी.एस.आई नेपालले अघिल्लो आर्थिक वर्ष २०७१/७२ मा २९ करोड ५४ लाख ६२ हजार रुपैयाँको पेय पदार्थको बिर्को विदेश निकासी गरेकोमा २०७२/७३ मा २० करोड सात लाख ६७ हजार रुपैयाँको मात्र निकासी गरेको संघको तथ्यांक छ ।

हेटौंडा औद्योगिक क्षेत्रस्थित यती पोलिकेम प्रालिको पनि विदेश निर्यातमा ८० प्रतिशतले गिरावट आएको छ । उद्योगले आर्थिक वर्ष २०७२/७३ मा ८१ लाख ५४ हजार रुपैयाँ बराबरको प्लास्टिकको कार्पेट विदेश निर्यात गरेको छ ।

हेटौंडाको बसामाडीस्थित नेचुरल फ्लावर एन्ड हर्वल उद्योगको अघिल्लो आर्थिक वर्षभन्दा विदेश निर्यातमा ४२ प्रतिशतले गिरावट आएको छ । उद्योगले २०७२/७३ मा एक करोड १५ लाख १५ हजार रुपैयाँको हर्वल सामान विदेश निर्यात गरेको थियो ।

हेटौंडा औद्योगिक क्षेत्रस्थित प्रोजियोकेम उद्योग प्रालिले नौ करोड ७८ लाख ५४ हजार रुपैयाँको प्लास्टिकका सामग्री विदेश निकासी गरेको छ । उद्योगले अघिल्लो आर्थिक वर्षको तुलनामा तीन प्रतिशत निकासी बढाउन सफल भएको संघले जनाएको छ ।

 

बारास्थित बालाजी नेचुरल उद्योगले भने अघिल्लो आर्थिक वर्षको तुलनमा ८५ प्रतिशतले बढी हर्वल सम्बन्धी सामग्री विदेश निर्यात गर्न सफल भएको छ । संघको तथ्यांकअनुसार आर्थिक वर्ष २०७२/७३ मा उद्योगले एक करोड १३ लाख १९ हजार रुपैयाँको सामान विदेश निर्यात गरेकोमा २०७१/७२ मा ६१ लाख १९ हजार रुपैयाँको मात्र सामान निर्यात गरेको थियो ।

हेटौंडा ११ स्थित नेपाल इकरात इन्जिनियरिङ प्रालिले आर्थिक वर्ष २०७२/७३ मा तीन करोड ८४ लाख १६ हजार रुपैयाँको ट्रान्सफर्मर विदेश निकासी गरेको संघले जनाएको छ । जय हार्दी खाद्य सप्लायर्स,काठमाडौंले आर्थिक वर्ष २०७२/७३ मा दश लाख २० हजार रुपैयाँको पान परागमा प्रयोग हुने हार्दी सामग्री विदेश निकासी गरेको छ । इकरात र जय हार्दीले गत आर्थिक वर्षदेखि मात्र विदेश निर्यात थालेको हो ।

नाकाबन्दी र भूकम्पका कारण मकवानपुरका उद्योगमा करिब ५० अर्ब रुपैयाँ बराबरको कारोबार प्रभावित भएको छ ।

हेटौंडा औद्योगिक क्षेत्रस्थित बहुराष्ट्रिय कम्पनी एसियन पेन्टसबाट गत आर्थिक वर्ष २०७२/७३ मा नमुनाका लागि दुई हजार पाँच सय रुपैयाँको रंग विदेश निकासी भएको संघले जनाएको छ । उद्योगबाट उत्पादित सबै रंग स्वदेश मै खपत हुने गरेको छ ।

उद्योग संघ मकवानपुरका अध्यक्ष नवराज अर्याललले नाकाबन्दी र भूकम्पका कारण मकवानपुरका उद्योगमा करिब ५० अर्ब रुपैयाँ बराबरको कारोबार प्रभावित भएको बताए । ‘लोडसेडिङका कारण उत्पादनमा पनि कमी आयो', उनले भने, ‘नाकाबन्दी र भूकम्पले थला परेका उद्योग बिस्तारै तंग्रिने प्रयास गरिरहेका छन् ।'