सम्बन्ध सुधार्न योजना बाँड्दैछन् भारतीय राजदूत

मकवानपुर: नाकाबन्दीका कारण भरत र नेपालबीच बिग्रिएको सम्बन्ध जनस्तरबाट सुधार गर्न भन्दै भारतीय राजदूत रञ्जित रे विकासे योजना बाँढ्दै राजधानीबाहिर घुम्न थालेका छन् । प्रशासनलाई जानकारी नदिई राजधानी काठमाडौंबाट घुमफिरका लागि मकवानपुरको पर्यटकीय क्षेत्र दामन पुगेका राजदूत रेले यस क्षेत्रको विकासमा सहयोग गर्ने आश्वासन दिए ।

यहाँका उद्योगी, व्यवसायी र स्थानीयसँगको छलफलका क्रममा उनले जनस्तरमा सम्बन्ध बिस्तार गर्न चाहेको बताउँदै आधा दर्जन विकासका योजनामा सहयोग गर्न आतुर रहेको बताए ।

थाहा नगर उद्योग वाणिज्य संघले गरेको छलफल कार्यक्रममा राजदूत रेले तरकारीको पकेट क्षेत्र दामनमा कोल्ड स्टोर निर्माण गरिदिने बताए । ‘तपाईंहरू प्रस्ताव लिएर आउनुहोस्, हामी सहयोग गर्न तयार छौं', उनले भने । कोल्ड स्टोर नहुँदा यहाँका किसानलाई बिऊ जोगाउन समस्या पर्नुका साथै सस्तो मूल्यमा तरकारी बेच्नुपर्ने बाध्यता छ । साथै उनले थाहा नगर क्षेत्रमा अर्गानिक तरकारी उत्पादन बढाउन सहयोग गर्ने आश्वासन दिए ।

यस क्षेत्रको पर्यटन प्रवद्र्धन गर्न प्रचार प्रसारसँगै भारतीय पर्यटक भित्र्याउन सहयोग गर्ने उनको भनाइ छ । दामनबाट विश्वका १४ मध्ये आठ वटा हिमशृंखला हेर्न सकिन्छ । हिन्दु र बौद्ध धर्मावलम्बीहरूको पवित्र तीर्थस्थल ऋषेश्वर मन्दिर र पाण्डुकेश्वर मन्दिर यहाँ रहेका छन् । राजदूत रेले अहिलेको चुनौती जनस्तरको सम्बन्ध मजबुत बनाउनु रहेको भन्दै यसलाई विकासको माध्यमबाट मजबुत बनाउनुपर्नेमा जोड दिए ।

भारत सरकारको सहयोगमा हेटौँडामा निर्माण हुन लागेको बहुप्राविधिक विश्वविद्यालयका लागि बजेट विनियोजन भइसकेको उनले जानकारी दिए । टेन्डर प्रक्रियाबाट निर्माणकार्य अघि बढाउने तयारी थालिएको रेले बताए ।

कार्यक्रममा वीरगन्जस्थित भारतीय महाणिज्यदूत अञ्जु रञ्जनले यस क्षेत्रका एक सय विद्यार्थीलाई कृषिसम्बन्धी उच्च शिक्षाका लागि वार्षिक छात्रवृत्ति दिइने आश्वासन दिइन् । भारतले सन् १९५३ मा तराईलाई कठमाडौंसँग जोड्ने त्रिभुवन राजपथ बनाएर यस क्षेत्रको विकासमा सहयोग गरेको बताउँदै उनले भनिन्, ‘अझै पनि कृषि, पर्यटन, शिक्षा र स्वास्थ्यको क्षेत्रमा प्याकेज बनाई सहयोग गर्ने हाम्रो चहाना छ ।'

मकवानपुर उद्योग वाणिज्य संघका अध्यक्ष राजकुमार न्यौपाने, थाहा नगर उद्योग वाणिज्य संघका अध्यक्ष कविराज खत्रीलगायतले यस क्षेत्रको सम्भावना र चुनौतीका बारेमा राजदूत रेलाई अवगत गराएका थिए । सोमबार दिउँसो दामन पुगेका राजदूत रेको टोली यहाँको धार्मिक तथा पर्यटकीय क्षेत्रको अवलोकन गर्दै मंगलबार बिहान काठमाडौं फर्किएको थियो ।