नयाँ सरकार गठनमा सघाउने भन्दै ओलीका मन्त्रीको राजीनामा
काठमाडौँ: प्रधानमन्त्री केपी शर्मा ओली नेतृत्वको सरकारका खानेपानी तथा सरसफाई मन्त्री प्रेमबहादुर सिंहले राजीनामा दिएका छन् ।
समाजवादी जनता पार्टीको तर्फबाट मन्त्री बनेका सिंहले बुधबार प्रधानमन्त्री ओली समक्ष राजीनामा बुझाएका हुन् ।
सिंहले राजीनामा बुझाएपछि अन्नपूर्णसँग कुरा गर्दै राष्ट्रिय सहमतिको सरकार गठनमा सहयोग पुगोस् भनेर राजीनामा दिएको बताए ।
‘हामीले पहिलादेखि नै राष्ट्रिय सहमतिको सरकारको पहल गरेका थियौँ । पार्टीको निर्णय अनुसार नै आज राजीनामा बुझाएको हुँ ।’
समाजवादी पार्टीको केन्द्रीय समिति बैठकले सरकारको समर्थन फिर्ता लिने निर्णय गरेपछि मन्त्रीपदबाट राजीनामा दिएको सिंहले प्रष्ट पारे ।
नेपाली कांग्रेस र नेकपा (माओवादी केन्द्र)ले प्रधानमन्त्री ओलीविरुद्ध व्यवस्थापिका संसदमा एक साता अघि अविश्वासको प्रस्ताव दर्ता गराएका छन् । अविश्वासको प्रस्तावमाथि बिहीबारको संसद बैठकमा छलफल हुने कार्यसूची रहेको छ ।
माओवादी केन्द्रले सरकारको समर्थन फिर्ता लिए लगत्तै माओवादीका आठ मन्त्रीले राजीनामा बुझाएका थिए ।
प्रतिक्रिया दिनुहोस !
