प्रचण्डले भने- सहमतिका लागि भारत र चीन कार्ड देखाउँदिन
काठमाडौं: प्रमुख राजनीतिक दलहरूभित्र अविश्वास र आशंकाको वातावरण बढ्न नदिन कांग्रेस, एमाले र माओवादी केन्द्रका नेताहरूसमक्ष चारवटा विकल्प प्रस्तुत भएका छन् । ती विकल्पमाथि चारवटै दलका शीर्ष नेतृत्व र दोस्रो पुस्ताका नेताहरूका बीचमा भइरहेको छलफलले सार्थकता पाए बिहीबार व्यवस्थापिका संसद्बाट सहज रूपमा राजनीतिक निकास निस्कने विश्वास तीनवटै दलका नेताहरूले लिएका छन् ।
नेकपा माओवादी केन्द्रका वरिष्ठ नेता हरिबोल गजुरेलका अनुसार प्रधानमन्त्री केपी शर्मा ओलीले पदबाट राजीनामा दिने, कांग्रेस र माओवादी केन्द्रले प्रधानमन्त्रीविरुद्ध संसद्मा दर्ता गराएको अविश्वास प्रस्ताव फिर्ता लिने, संसद्मा विचाराधीन विनियोजन विधेयक पारित गर्ने र नयाँ सरकार गठन प्रक्रिया सुरु गर्ने विकल्पमाथि छलफल भइरहेको छ । ‘ती विकल्पमाथि छलफल भएमा दलहरूबीचको अविश्वास र आशंकाको वातावरण रहने छैन, सहज निकास निस्कन सक्छ', गजुरेलले अन्नपूर्णसँग भने, ‘सत्ता पक्ष कसरी प्रस्तुत हुन्छ भन्नेमा निर्भर गर्छ ।'
कांग्रेस र माओवादीले बिहीबारको संसद् बैठकमा अविश्वास प्रस्तावमाथि पहिला छलफल गर्न लगाउने अडान लिएका छन् भने एमालेले विनियोजन विधेयकलाई पहिलो प्राथमिकतामा राख्नुपर्ने अडान लिएको छ ।‘रातभर र बिहीबार बिहानसम्म आकस्मिक सहमति नभएमा अविश्वासको प्रस्तावमाथि छलफल हुन्छ', माओवादी केन्द्रका सांसद रामनारायण बिडारीले अन्नपूर्णसँग भने ।
बिडारीका अनुसार दलहरूबीच सहमति भएमा संसद्ले नयाँ सरकार गठनका लागि प्रक्रिया अगाडि बढाउने र राष्ट्रपतिले सरकार गठन गर्न संसद्लाई आह्वान गर्ने स्थिति आउन सक्छ ।
‘सहमतिका आधारमा सरकार गठन गर्न राष्ट्रपतिले समयसीमा तोक्ने र सो समयभित्र सहमतिको सरकार गठन हुन नसकेमा बहुमतीय सरकार गठनका लागि राष्ट्रपतिले आह्वान गर्न सक्नुहुन्छ', बिडारीले भने ।
अविश्वास प्रस्तावका पक्षमा मतदान गर्न र त्यसको पक्षमा वातावरण बनाउन दाहालले आफ्ना सांसदलाई निर्देशन दिएका छन् । ओलीलाई पदबाट हटाउन अविश्वासको प्रस्ताव संसद्मा दर्ता गराएका माओवादी केन्द्रका अध्यक्ष दाहालले आफू भारत वा चीन कार्ड देखाउने पक्षमा नरहेको प्रस्ट्याएका छन् । आफूहरूलाई भारततर्फ लागेको र चीनविरोधीका रूपमा प्रस्तुत गरिएकोमा आपत्ति जनाउँदै भाबी प्रधानमन्त्रीका रूपमा प्रस्तावित दाहालले आफूले भारत र चीनका बीचमा सन्तुलित सम्बन्ध कायम राख्न कोसिस गर्ने पनि बताए ।
‘दुवै मुलुकबीच सन्तुलित र दौत्य सम्बन्ध कायम राख्न हाम्रो अध्यक्ष दृढ हुनुहुन्छ', बिडारीले भने । संसदीय दलको बुधबारको बैठक दाहालले शान्तिप्रक्रियलाई पूर्णता दिनका लागि पनि माओवादी नेतृत्वमा सरकार गठन गर्न उपयुक्त हुने धारणा व्यक्त गरेका हुन् ।
‘भारत र चीन दुवै नेपालको शान्ति र स्थिरताका पक्षमा छन् । शान्ति प्रक्रियाका बाँकी कामलाई पूर्णता दिनका लागि माओवादी नेतृत्वमा सरकार गठन गर्दा भारत र चीनलाई आपत्ति छैन', दाहाललाई उद्धृत गर्दै नेता गजुरेलले भने । लडाकु समायोजन पनि माओवादी नेतृत्वकै सरकारले गरेको गजुरेलले स्मरण गराए ।
प्रतिक्रिया दिनुहोस !
