जलमग्न भयो जनकपुर
जनकपुरधाम: अविरल वर्षाका कारण जनकपुर उपमहानगरपालिका जलमग्न भएको छ । लगातार तीन दिनदेखि भइरहेको वर्षाका कारण नगर प्रवेश गर्ने मुख्य सडक डुबानमा परेका छन् भने अधिकांश नगरवासीको घरमा पानी प्रवेश गर्दा जनजीवन अस्तव्यस्त बनेको छ ।
जनकपुर अञ्चल अस्पतालको आकस्मिक कक्षमासमेत एक फिटभन्दा बढी पानी जमेका कारण बिरामीको उपचारमा कठिनाइ उत्पन्न भएको छ । अस्पताल परिसरमा पानी पस्दा बिरामी र कुरुवालाई औषधि ल्याउन, टिकट काट्न समस्या भएको हो । जनकपुरका अधिकांश सरकारी कार्यालयसमेत डुबानमा परेका छन् । जनकपुर अञ्चल यातायात कार्यालयमा पानी भरिँदा लाइसेन्स नवीकरण, नामसारीसहित राजस्व बुझाउन आउने सेवाग्राहीलाई सास्ती खेप्नु परेको छ ।
त्यसैगरी जिल्ला प्रशासन कार्यालय धनुषा, आन्तरिक राजश्व कार्यालय, जिल्ला प्रहरी कार्यालय, कृषि कार्यालय, हुलाक कार्यालय, जिल्ला विकास कार्यालय, मालपोत कार्यालय, नापी कार्यालयसहितका सरकारी अड्डा जलमग्न भएपछि सेवाग्राहीलाई समस्या भएको छ । जिल्लाको तुल्सीयाही निकास गाविसबाट नागरिकता बनाउन जिल्ला प्रशासन कार्यालय आएका शिवकुमार झाले कार्यालय आउने बाटो र परिसरमा समेत पानी जमेको कारण उभिनसमेत कठिन भएको बताए ।
जनकपुर विमानस्थलको रन वे पानीले डुबेपछि जहाज अवतरण गर्न र उडान गर्न अप्ठ्यारो भएको छ । यस्तै अवस्था रहे उडान रद्द गर्नुपर्ने अवस्था आउने विमानस्थलका कर्मचारीले बताएका छन् ।
नगरक्षेत्रमा वकिल टोल, मिल्स एरिया, कदम चोक, विश्वकर्मा चोक, क्याम्पस चोकमा रहेका सयौं घरमा पानी पसेपछि सर्वसाधारणलाई दैनिकी चलाउन कठिन भएको छ ।
जनकपुर नगर क्षेत्रमा नालाको उचित व्यवस्था नहुँदा र अव्यवस्थित सहरीकरणका कारण वर्षात्मा पानीको निकास नहुने समस्या विकराल हुँदै गएको हो । उपमहानगरपालिका कार्यालयले घरको नक्सा पास गर्दा अनुगमननै नगर्ने र घरधनीले मनोमानी रूपमा नाला पुरेर घर बनाउने र सडक संरचनामा समेत क्षति पुर्याएका हुनाले पानी निकासको समस्या भएको सेभ हिस्टोरिक जनकपुरका संयोजक रामाशीष यादव बताउँछन् ।
असार मसान्तमा बजेट मिलाउनका लागि विभिन्न कार्यालयले सडकको मापदण्डनै नहेरी मनपरी रूपमा ग्राभेल हालेर सडक अग्लो बनाएका हुनाले पनि बस्ती डुबानमा पर्न थालेको यादवको भनाइ छ । नगरका पानी निकास हुने नालाहरू जीर्ण भइसकेका र कतिपय स्थानमा सडकभन्दा नाला माथि भइसकेको हुनाले वर्षाको पानीले निकास पाउन कठिन भएको हो ।
जनकपुरमा नाला, सडक र फोहोरमैला व्यवस्थापनका लागि एसियाली विकास बैंकको ऋण सहयोगमा दुई अर्बको लागतमा एकीकृत सहरी विकास आयोजना सञ्चालन भए पनि हाल वर्षा र हिलोको समस्याका कारण काम अगाडि बढ्न सकेको छैन ।
प्रतिक्रिया दिनुहोस !
