बोक्सी आरोपमा महिलालाई दिसा खुवाइयो
वीरगन्ज: पर्साको हरिहरपुर गाविसमा एक महिलालाई बोक्सीको आरोपमा दिसा खुवाइएको छ । हरिहरपुर गाविस २ का नेवानी राम र उनकी श्रीमती चम्पा देवीले बोक्सीको आरोप लगाउँदै गत शनिबार बिहान जबरजस्ती दिसा खुवाएको पीडित महिलाले बताएकी छन् ।
शनिबार बिहान धान रोप्न छिमेकी महिलालाई बोलाउन घरबाहिर निस्किएकी आफ्नी श्रीमतीलाई बाटोमा राम र उनकी श्रीमती चम्पा देवीले जबरजस्ती समातेर दिसा खुवाएको पीडित महिलाका श्रीमान्ले बताए ।
'श्रीमान् बिहानै खेतमा गइसक्नु भएको थियो । म खेत रोप्न छिमेकी महिला बोलाउन घरबाट निस्किएको थिएँ', बिहीबार जिल्ला प्रहरी कार्यालय पर्सामा भेटिएकी पीडित महिलाले रुँदै भनिन् ,‘अचानक पछाडिबाट आएका नेवानी र उनकी श्रीमतीले जबरजस्ती समातेर सिसीमा ल्याएको दिसा मुखमा कोचिदिए ।'
खेतमा काम सकेर साँझ घर फर्किएपछि पीडित महिलाका श्रीमान् घटनाका बारेमा सोधपुछ गर्न जाँदा रामले कुटपिट गरेका थिए । कुटपिटबाट उनको देब्रे हात भाँचिएको छ ।
दिसा खुवाएपछि राम र उनकी श्रीमती चम्पा देवीले गाउँमा घुमेर गाउँलेलाई आफूले महिलालाई दिसा खुवाएको भन्दै हल्ला फिजाउँदै हिँडेको पीडित महिलाका श्रीमान्ले बताए ।
खेतमा काम सकेर साँझ घर फर्किएपछि पीडित महिलाका श्रीमान् घटनाका बारेमा सोधपुछ गर्न जाँदा रामले कुटपिट गरेका थिए । कुटपिटबाट उनको देब्रे हात भाँचिएको छ ।
दिसा खुवाएपछि राम र उनकी श्रीमती चम्पा देवीले गाउँमा घुमेर गाउँलेलाई आफूले महिलालाई दिसा खुवाएको भन्दै हल्ला फिजाउँदै हिँडेको पीडित महिलाका श्रीमान्ले बताए ।
रामकी छोरी एक वर्ष पहिले माइती आएका बेला उनका जेठा छोराको मृत्यु भएको थियो । अहिले केही समयदेखि माइतीमै रहेकी रामकी छोरीको नवजात शिशु पनि बिरामी छन् ।
बोक्सीको तन्त्र मन्त्र लगाएर आफ्नो जेठो नाति मारेको र अहिले कान्छो नातिलाइ पनि उनले नै तन्त्रमन्त्र गरेका कारण बिरामी पारेको भन्दै दिसा खुवाएको पीडित महिलाका श्रीमान्ले बताए ।
पीडित महिलाले घटनाबारे बुधबार मात्रै जिल्ला प्रहरी कार्यालय पर्सामा उजुरी दिएकी थिइन् । उनको उजुरीको आधारमा प्रहरीले आरोपित राम र उनकी श्रीमती चम्पा देवीलाई नियन्त्रणमा लिएको छ । उनीहरूलाइ इलाका प्रहरी कार्यालय पोखरियाको हिरासतमा राखिएको छ । पर्साका प्रहरी उपरीक्षक राजुबाबु श्रेष्ठले भने पीडित महिला दिएको उजुरीका आधारमा आरोपित राम र उनकी श्रीमतीलाई सोधपुछका लागि बिहीबार नियन्त्रणमा लिएको बताए ।
घटनाका बारेमा सत्यतथ्य बुझ्न इलाका प्रहरी कार्यालय पोखरियाका प्रहरी निरीक्षक चक्रबहादुर शाहलाई निर्देशन दिइएको प्रहरी उपरीक्षक श्रेष्ठले जानकारी दिए ।
आरोपित रामले भने आफूले ती महिलालाई बोक्सीको आरोप नलगाएको बताए । ‘मैले न बोक्सीको आरोप लगाएको छु, न दिसा नै खुवाएको छु', उनले भने,‘ कुलोको पानीको विषयमा पहिले देखिको झगडा थियो, त्यही निहुँमा ती महिलाले ममाथि यस्तो आरोप लगाएकी हुन् ।'