संसद बैठक ४:३० बजे बस्ने, एकीकृत कार्यसूची दर्ता हुँदै

काठमाडौँ: दिउँसो २ बजेका लागि बोलाइएको व्यवस्थापिका संसद ४ः३० बजेसम्मका लागि स्थगित गरिएको छ । ४:३० बजे बस्ने संसद बैठकमा आर्थिक विधेयक र प्रधानमन्त्रीविरुद्धको अविश्वासको प्रस्तावलाई एकीकृत रुपमा प्रस्तुत गरिने भएको छ ।

प्रमुख तीन दलले पहिला सरकारले संसदमा प्रस्तुत गरेको आर्थिक विधेक दर्ता गर्ने र त्यसमाथि छलफल गरेपछि मात्र प्रधानमन्त्री केपी शर्मा ओलीविरुद्धको अविश्वासको प्रस्तावमाथि छलफल गर्ने सहमति गरेपछि संसदमा एकीकृत प्रस्ताव दर्ता हुने भएको हो ।

तीन दलका शीर्ष नेताबीचको सहमति अनुसार संसद बैठक सुरु हुने बित्तिकै सभामुख  ओनसरी घर्तीमगरले आर्थिक विधेयक प्रस्तुत गर्नेछिन् । आर्थिक विधेकमाथिको छलफलपछि मतदान हुनेछ । आर्थिक विधेयकको पक्षमा एमालेले मतदान गर्ने छ भने विपक्षमा नेपाली कांग्रेस र माओवादी केन्द्रले मतदान गर्नेछन् ।

कांग्रेस र माओवादीले आर्थिक विधेयक पारित गर्न समर्थन नगर्दा आर्थिक विधेयक पारित नहुने निश्चित छ । आर्थिक विधेयक पारित नहुनुलाई सरकारको असफलताको रुपमा हेरिन्छ ।

आर्थिक विधेयकको कार्यविधि सकिएलगत्तै प्रधानमन्त्रीविरुद्धको अविश्वासको प्रस्ताव संसदमा पेश हुनेछ । अविश्वासको प्रस्तावको प्रस्तावक माओवादी केन्द्रका अध्यक्ष पुष्पकमल दाहाल ‘प्रचण्ड’ बन्ने छन् भने उक्त प्रस्तावलाई शेरबहादुर देउवाले समर्थन गर्नेछन्।