संसद् बहिष्कार गर्दै आएका मोर्चाका सांसदहरु पनि बैठकमा सहभागी
काठमाडौं : निरन्तर संसद्को बैठक बहिष्कार गर्दै आएका मधेसी मोर्चासहितको गठबन्धनसँग आवाद्ध सांसदहरु पनि बैठकमा सहभागी छन् ।
ओली सरकार गिराउने काममा सहयोग गर्ने निर्णयबमोजिम उनीहरु संसद् बैठकमा सहभागी भएका हुन् । संसद् बैठक अघि कांग्रेस र माओवादी केन्द्रका नेताहरु र मधेसी मोर्चाका नेताहरुबीच अविश्वास प्रस्तावलाई सफल बनाउने सहमति भएको थियो ।
संविधान जारी भएपछि नै मधेसी मोर्चाका सांसदहरुले मधेस मुद्दामा संशोधनको माग गर्दै संसद्को बैठकमा सहभागी भएका छैनन् । प्रधानमन्त्री र राष्ट्रपतिको मतदानमा भने उनीहरु सहभागी भएका थिए ।
प्रधानमन्त्रीको मतदानमा मधेसी मोर्चाका सांसदहरुले सुशील कोइरालाको पक्षमा र केपी ओलीको विरुद्धमा मतदान गरेका थिए भने राष्टपति निर्वाचनमा पनि विद्या भण्डारीविरुद्ध मतदान गरेका थिए।
मधेससहितको गठबन्धनमा ४२ जना सांसदहरु छन् । संसदमा कायम रहेको सांसद संख्याको बहुमत अर्थात २ सय ९८ जना सांसदको समर्थनमा नयाँ सरकार बन्न सक्छ।अहिले ओली नेतृत्वको सरकारको पक्षमा अब २ सय ५३ जना सांसद मात्र रहेका छन् । कांग्रेस, माओवादी, मधेसी तथा अन्यसमेत गरी सरकारको विपक्षमा भने ३ सय ४१ जना सांसद पुगेका छन् ।
प्रतिक्रिया दिनुहोस !
