भारतीय बाँधका कारण नेपाली भूमि डुबानमा

भैरहवा: अन्तर्राष्ट्रिय कानुनविपरीत भारतीय पक्षले दसगजानजिकै एकतर्फी रूपमा बनाएको बाँध तथा उच्च सडकका कारण नेपालका रूपन्देही र कपिलवस्तुको सीमावर्ती भूमि डुबानमा परेको छ । सीमानजिकै भारतले बनाएको बाँध तथा सडकले पानी रोकिँदा नेपालतर्फको हजारौं हेक्टर भूमि जलमग्न भएको हो ।

भारतले सीमा सडक निर्माण योजनाअन्तर्गत विगत १५ वर्षदेखि दसगजा नजिकै सडक विस्तार गर्दै सडक उच्च र पक्की बनाई पानी निकास रोकिँदा डुबानको समस्या आएको डुबान प्रभावित मोहम्मद फारुद खाँले गुनासो गरे ।

बाँधको फाँटक पूर्ण रूपमा नखोल्दा, सडकमा राखिएका कल्भर्ट सानो र जमिनदेखि चार फुट माथि राख्दा सीमावर्ती हजारौं खेतीयोग्य भूमि डुबानमा पर्दा धान रोपाइँ गर्नबाट वञ्चित भएको नेपाल किसान संघका केन्द्रीय सदस्य चतुर्भूजमणि त्रिपाठीले जानकारी दिए । ‘हुलाकी सडक आसपास धान हरियै भएको छ, दक्षिणको खेत डुबानले सागर बनेको छ', किसान संघका जिल्ला अध्यक्षसमेत रहेका त्रिपाठीले भने ।

‘जमिन भएर पनि खेती गर्न पाएका छैनौं । बर्खामा पानी छेकेर नेपाललाई डुबान पारिदिने, हिउँदमा खोलेर भारतले सिँचाइ गर्ने खतरनाक काम भइरहेको छ । हामी नेपाली किसान धेरै अन्यायमा परेका छौं । सरकारले समयमा बिउ, मल पनि दिन सक्दैन, डुबान प्रभावित क्षेत्रका लागि नयाँ जातको बाली लगाउन अनुदान सहयोग पनि गरेको छैन । बालबच्चा कसरी बचाउने ?' वेतकुईयाका किसान रामदास यादवले गुनासो गरे ।

रूपन्देही जिल्ला सदरमुकाम भैरहवा नजिक डन्डा बाँध, मर्चवार क्षेत्रको रसियावाल खुर्दलोटन बाँध एवं सडक, कपिलवस्तु वजाहा, सिसवा, मर्थी र बजहा सागर बाँधका कारण दुई दर्जन गाविस प्रभावित छन् ।

बिहीबार रातिदेखि शुक्रबार अपराह्नसम्म परेको अविरल वर्षापछिको बाढीले निकास नपाउँदा ती क्षेत्र जलमग्न भएका छन् । डुबान प्रभावित क्षेत्र बढे पनि मानवीय क्षति भने नभएको जिल्ला दैवी प्रकोप उद्धार समितिका संयोजक एवं प्रमुख जिल्ला अधिकारी विष्णुप्रसाद ढकालले बताए ।