नक्कली लाइसेन्स बोक्ने चालकमाथि कारबाही तीव्र

काठमाडौं: केशरमहलमा लेन मिचेको कसुरमा कारबाहीमा परेका प्रकाश श्रेष्ठले ट्राफिक प्रहरीलाई खल्तीबाट दिएको सवारी अनुमतिपत्र (लाइसेन्स) हेरेर ट्राफिक प्रहरी अक्कनबक्क परे ।

स्मार्ट लाइसेन्समा उल्लिखित अनुहार र श्रेष्ठको अनुहार फरक पाएपछि ट्राफिक प्रहरीले सोधे, ‘तपाईंको नाम के हो ? ' श्रेष्ठले आफ्नो नाम प्रकाश बताए । लाइसेन्समा भने धनराज शर्मा पौडेल उल्लेख थियो ।

असार २९ को यो घटनामा महानगरीय ट्राफिक प्रहरी वृत्त दरबारमार्गले श्रेष्ठलाई थप छानबिन गर्नुपर्ने ठहर गर्दै कार्यालयमा ल्यायो । पौडेलको लाइसेन्स कसरी आफूले बोकें भन्नेबारे श्रेष्ठ पनि दुविधामा परे ।

उनले मनिपर्स हेर्दा अर्को लाइसेन्स फेला पारे । दोस्रो लाइसेन्स भने आफ्नै थियो । तर कागजबाट बनेको । ट्राफिक प्रहरीलाई झन् शंका लाग्यो । श्रेष्ठले ट्राफिकलाई बुझाएको पौडेलको लाइसेन्समा फोननम्बर उल्लेख थियो ।

वृत्तका प्रमुख ट्राफिक प्रहरी निरीक्षक सुनिलजंग शाहका अनुसार पौडेललाई वृत्तमा झिकाउँदा उनको साथबाट श्रेष्ठको स्मार्ट लाइसेन्स फेला पर्‌यो । श्रेष्ठसँग दुई फरक नम्बरका लाइसेन्स भेटेपछि यातायात व्यवस्था कार्यालय गएर बुझ्दा सुरुको कागजबाट बनाइएको लाइसेन्स अर्के व्यक्तिको नाममा थियो ।

उक्त लाइसेन्स ए, बी, एफ र जी ग्रुपको थियो भने स्मार्ट लाइसेन्समा ग्रुप ए र बी मात्रै । श्रेष्ठ झुटा साबित भए । उनलाई सरकारी छाप दस्तखत किर्ते अभियोगमा प्रहरीले कारबाही थालेको छ । ग्लोबल आईएमई बैंकमा कारोबार गर्दा बैंककै कर्मचारीले लाइसेन्स साटिदिएका थिए ।

दुई वर्षको अवधिमा ट्राफिक प्रहरीले विभिन्न स्थानबाट ३० वटा नक्कली लाइसेन्स फेला पारेको थियो । यीमध्ये २५ वटा लाइसेन्सका चालकले सुरुमा बनाएका नक्कली लाइसेन्स ट्राफिक प्रहरीले समातेपछि पुनः दोस्रोपटक लाइसेन्स बनाएका थिए ।

महाशाखाका अनुसार गत मंसिरमा स्याङ्जा पुतलीबजारका प्रसन्न अर्याल नक्कली लाइसेन्ससहित समातिए । उनले पाँच पटकसम्म लाइसेन्स बनाएका थिए । त्यसैगरी वीरगन्ज पर्साका मनीष लाखेले चारपटकसम्म नक्कली लाइसेन्स बनाएको महाशाखाको अनुसन्धानबाट खुल्यो । गत जेठ १८ गते सर्लाहीका सुमन थापा अर्काको लाइसेन्स बोकेर सवारी हाँकेको अवस्थामा फेला परे । महाशाखाले अनुसन्धान गर्दा उनले बोकेको लाइसेन्स नक्कली थियो ।

महाशाखा प्रमुख डीआईजी प्रकाश अर्यालले ट्राफिक प्रहरीको कडाइपछि नक्कली लाइसेन्स बोक्नेको संख्या कम भएको बताए । ‘नक्कली लाइसेन्स बोकेको अवस्थामा फेला परेपछि सरकारी छाप दस्तखत किर्तेमा जेलसमेत जानुपर्ने कानुनी व्यवस्था भएपछि पनि चालक संयमित भएको हुनुपर्छ । अझै पनि हामी त्यस्ता चालकलाई खोजी रहेका छौं', अर्यालले भने ।

एक सय ६१ चालकको लाइसेन्स निलम्बनमा